علاء عطا

علاء عطا (63)

علاء عطا يكتب هل هو بروفيسور ورئيس قسم ؟!

Written by
Published in علاء عطا
الأحد, 28 حزيران/يونيو 2015 10:50

كنت متردداً بكتابة مقال عن بقاء فيريرا قبل ساعات من مباراة الصافقسى،كتبت بعض السطور ولكنى شعرت أنها ستذهب مهب الريح لو حدث أى شئ لاقدر الله لأنه ببساطة كما ذكرت منذ إسبوعين أن جمهور الزمالك تورط أن يسلب رئيس ناديه فرحته بالسباحة عكس التيار رغم أنه شارك بصفة أساسية فى النجاح ولكن الشعور بالخوف من القادم جعل الفرحة المؤكده مؤجله بل تحولت لمؤقته لدرجة وصلت للشك،رغم أن اليقين الواضح أننا صرنا فريق كرة قدم حقيقى من جديد.

فاز الزمالك لاول مرة فى الجولة الاولى منذ 13 عام بالتمام بالكمال لتكون البداية الاروع منذ وقت طويل،فى هذه المباراة تحديداً لأول مرة أشعر أن الفريق يمتلك أنياب و لو تم التدعيم الذكى فى موسم الانتقالات لأصبح فريق متكامل، تدعيم يعتمد على تقييم النواقص التى يحددها فيريرا وحده فقط ولا غيره ويتم الترشيح له من هم فى هذه المراكز ثم يتم الإختيار لا لمجرد الخناق على الأهلى لأننا ببساطة فريق لدينا إمكانيات البطل ولكن نحتاج الثقة فقط.

سجلت بعض خواطرى حتى اريح نفسى مما سيحدث الفترة القادمة لأننا بالفعل ندخل عبر أضيق نفق منذ 10 اعوام فإما أن نصبح أقوياء لفترة أو نعود تدريجياً للسقوط،إسبوعان فقط يحددان قوة هذا النادى إدارياً.

*العنوان تتفق عليه أو تختلف ولكن الرجل بكتيبته لديه وجود نشعر به واللياقة البدنية التى أرى عليها اللاعبون يجعلنى اشعر أن العواطف تتنحى جانباً وهذا يصنع الفرق الكبيرة.

*إستمرار فيريرا صدقونى ليس أوبشان نتشاجر عليه،يجب أن نتفق عليه حتى وإن لم نرى الكرة التى نتمناها أو نرى لاعبين نحبها لا تلعب او اخرون يعتبروا فرض عين،القصة اكبر بكثير من الفلسفة الزائدة،شئنا أم ابينا بقاء الرجل بما فيه من سلبيات أحسن بكثير أن يأتى آخر تحلمون معه من جديد مهما كان إسمه،يجب أن نستقر لموسم،موسم واحد فقط إعتبروه إنتقالى،رجاءً.

*فتش فى مميزات فيريرا قبل عيوبه تجد أن الرجل يدير المنظومه بشكل أكثر علمياً فى التدريبات والاحمال وغيرها،له شخصية واضحه،قليل التصريحات وقليل الرد على رئيس نادى يتاجر باسم رجل كبير أوروبيا عبر شاشات محليه،إبحث عن هذه الميزة.

*انظروا إلى التطور الغير طبيعى بالمعنى الحرفى فى مستوى عمر جابر،لاعب تحول من جبان يجرى على الخط ويعود للوراء ويعطى الكرة إلى اقرب لاعب بجانبه للاعب منتج يجرى يميناً ويساراً وتوظيفه عكس إتجاه قدمه جعل منه لاعب أكثر إفاده،فيريرا أخرج من عمر ما لم يعلمه عمر عن نفسه،هذا التطور يحتاج منا سؤال ووقفه،هل هذا الرجل حقاً لا يفعل شيئاً؟!

*انظروا الى مصطفى فتحى تحول للاعب ايجابى ليس فقط على الاطراف ولكن الاختراقات صارت منظمة واكثر وضوحاً وهذا يدل على توجيهات المدرب بعيداً عن فطرة اللاعب الموهوبه لان موهبه دون توجيه تصبح لاعب كرة صالات.

*نعم أوافقك أن هذا ليس كافياً ولكن ارجوكم لا نجعل العواطف تسبقنا مجدداً فكرة القدم فعلاً لا تدار بهذا الشكل والتاريخ لا يسجل سوى السطر الاخير من الحكاية.

*المعطيات لدى فيريرا هو إستعملها ويحاول تطويرها وعند سند النواقص العام القادم ربما نرى الجديد ،لغة الارقام على كل الاصعده تقول أننا منفردين على صدارة الدورى وفى ارقام أخرى قياسية تحققت.

*يجب أن يعلم الجميع أن أولى خطوات عودة المنافس هو سقوطك أنت،هو لا يستطيع أن يقوى دون سقوطك،عودوا بالزمن وإعلموا أن فترة التسعينات وبداية الالفية الثانية لو كان الزمالك وقتها بعافيته ما اتسع الفارق فى البطولات بهذا الشكل ولكن هدم المعبد من الداخل بايدى حراسه أصعب بكثير من الخارج،لذا أتمنى الا نكرر هذا الغباء الادارى مجدداً.

*لا فائدة من العودة لنقطة الصفر التى حدثت منذ عام،ميدو بإختصار ليس المدرب الاجدر بقيادة الفريق وإن كنا دافعنا عنه موسم كامل فحينما يعود يجب أن يكون تعلم أكثر مما هو فيه بكثير لكى يكون مدرب الزمالك مع كل إحترامنا لتاريخه كلاعب ولكن ميدو يحتاج لتغيير شخصيته وكاريزمته نفسها قبل حمل العرين من جديد.

*بقاء كل اللاعبين الموجودين حالياً اللهم إلا رحيل بعضهم مما لم يحدثوا الفارق يجب أن يحدث بهدوء يطمئن من سنتعاقد معهم أن من سيأتى فقط سينصهر فى هذا الفريق،وقوفنا كجماهير بعضنا البعض سيعطى هذا الفريق قوة جبارة تساعده على السير بقوة.

*كل هذا دون قيمة لو لم يقف رئيس النادى قليلا مع نفسه فى قراراته،كفى الذات التى ستؤخرنا كثيراً،وكفى فشخرة الفضائيات لأننى كما ذكرت إسبوعان فاصلان فى كل شئ.

*مبارة الصفاقسى بالفعل تعتبر من المبارايات الحاسمة التى يمكنها أن تصنع فارق كبير فى كل شئ،فى الفوز بلاعب مركون من فترة،من لاعب إسمه أوباما لعب مباراة حاسمة كهذه،من حظ اخيراً ابتسم لك فى الدقائق الحاسمه،من فوز فى أول جولة لم يتحقق منذ فترة،من تكتيك جعلك تجعل المنافس قزم أمامك،من لاعب إسمه ايمن حفنى يشعرك بالمتعه،من لاعب أخر اسمه عمر جابر يشعرك لماذا تحب هذا النادى،من مدير فنى غامر فى تغييراته فى مباراة كهذه، من فريق افتقد مهاجمه الاساسى ولم يعبأ، من فريق انصهر فى عودة اسم النادى للنضج،فهل لا تستحق هذه المباراة أن نتكاتف جميعاً أن ناخذها دافع قوى لتصحيح المسار؟

أرجوكم إعقلوها قليلاً واتركوا المتعه قليلا جانباً وانتظروها الموسم الجديد،أرجوكم لنلتزم جميعاً شعور أننا جميعاً مدراء فنيين بداخلنا،إجعلوا العاطفة جانباً وبعد ذلك إنتقدوا،إدعوا لمن يمتلك الامر أن يهدأ ويفكر قليلاً،فشعره بين قرار قد يجعلك فى القمة،لقرار قد يأخذك بما لا تشتهى السفن،أرجوكم دعموا فيريرا لا لشئ سوى الوقوف لمدة موسم فقط على أرجلنا،موسم قد يعيد اشياء كثيرة،ربما أكون مخطئ بما أقول ولكنى متأكد أنه افضل من قرارات أكثر سوء..يارب.



علاء عطا #كل_سبت

Comments ()

العملية " إى.. فو.. نا "!! #كل سبت علاء عطا

Written by
Published in علاء عطا
السبت, 20 حزيران/يونيو 2015 21:27

 صباح يوم باكر فى أحد الاماكن بالعالم..خطوات سريعه متجهه الى غرفة يدخلها شخص ويغلق الباب خلفه فيقف من فى الغرفة منتبهاً يقاطعهم صاحب الخطوات "إقعدوا! ".. صمت لدقائق ثم يبدأ الشخص فى التحدث" إيه الاخبار؟" " كله تمام ياباشا" " الرجالة عاملة ايه؟" " كله تحت السيطرة" " سيطرة ايه وزفت ايه،الناحية التانية كل شوية قاعدين يقولوا خلصوا والواد اياه كل شوية يكتب انه مرة هنا ومرة فى الجابون ومرة قاعد مع الوداد، افتح لى ملف بسرعة وسميه ملف بالشفرة بتاعتنا ،العملية السرية إى فو نا ، وبسرعة كلملى الرجالة التانية تطلع بطيارة على الجابون،ياللا".

وعلى الطرف الاخر فى احد الاماكن بالعالم..يدخل شخص حاملاً هاتفه على غرفة الاجتماعات متحدثاً " يابنى خلصت ولا لسه،واللى بيطلع يقول فى التليفزيون انه خلص ده،فهمنى،الو،الو،رد......" يقف من فى الغرفة منتبهاً يقاطعهم الشخص " إقعدوا! " "مالك ياباشا ايه مضايقك" "الواد خلصتوه ولا لسه؟" "لسه يا فندم عميلنا على سواحل السنغال ادانا اخبارية بشفرة موريس انه على وشك استهداف الهدف بعد انقطاع الارسال عن الجابون" " يعنى هنتنيل نعلن ولا لسه؟" "والله ياباشا ماقدرش اوعدك " "خلاص طلعلى طياره شارتر مخصوص على اسبانيا،ومنها خلى عملائنا ياخدوا فالوكة للمغرب هيلاقوا ناس مستنينهم هناك هيوصلوهم للهدف،اتفقنا " "اعتبره تم معاليك".

وفى احد مقاهى الجابون..شخصين يحتسان شاى ذو ملامح مصرية ببشره سمراء.. " تفتكر هنتهرش؟" "ماعتقدش " "تفتكر المخدر اللى حطينهالهم فى العصير ينيمهم " " متهيالى احنا نمضى الواد ونخلص ونسافر يكونوا لسه فايقين" "طب ماتش الجابون هيخلص امتى ؟ " " مش عارف،ادينا قاعدين مستنيين الماتش يخلص،اهم حاجة سيب اذاعة الشباب والرياضة،ولو سمعنا الكلمة البيض بتاعة ،ملعب إف إم ، ديه شفرة اننا نهجم على اوضة اللبس ونجيب الواد فى شوال،رئيس النادى قال كده،قشطة" "قشطة".

وفى احد الفنادق الشهيرة بدون ذكر اسمها عشان اعلان.."قوم،قوم الله يخرب بيتك،خدرونا" "ايه ده،هو باقى قد ايه من الماتش؟" " ربع ساعة" " طب بسرعة قوم نلبس ونروح نضرب قنابل مسيلة للدموع لغاية ما نجيبة من جوه الاستاد قبل العيال التانية لحسن الباشا ينفخنا" " ياللا! " .

امام استاد الجابون الدولى.. تبادل اطلاق النار بين اشخاص مجهولة والشرطة الجابونية تبادلهم اطلاق النار وهرج ومرج بين اشخاص عليهم الملامح المصرية وقنابل مسيلة للدموع والشرطة الجابونية تخلى الاستاد وتستطيع تنفيذ عملية هروب لاعبى الجابون.

غرف العمليات باحد المناطق فى العالم.."الو غرف العمليات" " الو حول" "بلغ رئيس النادى فشل الخطة، الهدف لم نستطيع خطفه" "يانهار ابوكوا اسود يعنى التانيين خطفوه" " لا،اتقبض عليهم وقدرنا نهرب احنا بس الهدف اختفى،حول" " طب خليك عندك لحين ارسال اشارة جديدة بدل ما رئيس النادى ينفخكم،حول!".

نهار باكر فى احد شواطئ المغرب..فتاة ترتدى البكينى تسير بمنتهى الرشاقة وتتمتم بلهجة لا يفهمها احد " الو حول" " حول يا تاتينا" " معاليك لا استطيع الوصول للوكيل" " ليه تاتينا مش قولتى انه يقضى العطلة هناك" " قيل انه تم خروجه مع فتاة شقراء ملامحها روسية وتوصلت انها من المعسكر الاخر،حول " " تاتينا ارجوكى حاولى ان تحبطى المحاولة باى شكل،حول" " علم وسينفذ".

فى مطار داكار،يصل شخص فرنسى حاملاً حقيبة سامسونيت يستقبله شخص اخر.. " هاه جاك،فين اى فو نا" " مسيو ايفيان،انت عارف اننا راصدين تحركاته بس المعسكر الاخر ارسل هوياتام لوكيلة بالمغرب" " هوياتام تانى اللى دوبت نص الوكلا،يابت الايه " مسيو ايفيان،اى فو نا ربما سيصل الى المغرب بعد يومان هل تريد شئ معين" " لا جاك،ارسل الى القاهرة الان فاكس بمحتوى الكلام الذى قلته وارسل فوراً اشارات لمضيق جبل طارق بتحرك الورقة الاخيرة لجلب اى فو نا" " ماشى مسيو ايفيان".

على حدود المغرب الجزائر.. "اهلا بك يا اخ العرب،شو تريد" " انا العميل كاف ميم عمليات اى فو نا من الجزيرة،هل وصلتكم الرسالة" "نعم،سنعبركم الان عبر الحدود ويرجى ارسال اشارات للقاهرة عند وصولكم الى مدينة الوداد حتى يصلنا التحويل البنكى بدون علم المعسكر الاخر" "علم وسينفذ".

غرف العمليات بالقاهرة " اقسم بالله لو ما جبتوه لانفخك وانت فى الجابون" " يا سيدى اسمعنى" " بلا اسمع بلا زفت يتجاب فورا فى شوال" " يا سيدى الهدف اختفى،وصلنا اشارات من السنغال بتحرك جبهتنا من مضيق جبل طارق عبر مسيو ايفيان" " مضيق ام كده يا اخى،انجزوا ليس لدينا وقت،يوووه،هو انا بتكلم كده ليه،بقولكم ايه 12 ساعة ويكون هو ووكيلة هنا،انا بقول اهوه"

وفى المعسكر الاخر" يا فندم انا مابكتبش تويته" " لا انت كتبت والناحية التانية بيقولوا تم،ايه القصة،وكيله فين خلص معاه باعلى سعر بقول اهوه" " يافندم" " مفيش فندم ،عو عو يقول لطاطا ايه"" يقول حاضر" " شاطر،ياللا ارفع راسى".

فى مطار الدار البيضاء وصول شخصين ذو ملامح بولندية.." مارتين،انت عرفت اللى بيحصل من فريقى مصر" " اه ولازم نخلص يا فرانك زى ما رئيس النادى بلغنا المنافسة اكسترا شرسة" "بس المعركة صعبه وخصوصا رئيس احد الناديين ممكن يعلقنا" " لا تقلق يا فرانك نحن لنا رجالنا ايضاً".

امام احد الفنادق بالمغرب..تقف سيارة ليموزين ينزل منها رئيس نادى الوداد ومعه ايفونا والوكيل ،العدسات تتسابق فى تصوير هذا المشهد،على اليمين يظهر فى الكادر رجال المخابرات الاستخبارية الزملكاوية،وعلى اليسار رجال المخابرات الحمراء مختبئة فى سيارة سوداء ذات لوحات نقل،ويظهر مارتين وفرانك من الوفد البولندى على هيئة رجال صحافة،يدخل رئيس الوداد ومعه اللاعب ووكيله الى بهو الفندق وفجأة تحدث اصوات وقنابل صوت وتبادل اطلاق النار وغبار كثيف مع قنابل مسيلة للدموع،وفجأة تهدأ الاصوات ويصرخ رئيس الوداد بعد القيام منبطحاً من الارض قائلاً " ايفونا،ايفونا، شقى عمرى !".

والسؤال الآن..

*حد شاف فى العالم صفقة تتم بهذا الشكل؟

*طب حد عارف ليه مفيش اخبار لمدة 10 ايام فى حاجة بتنتهى فى العالم فى ربع ساعة وكل يوم نفس الاخبار؟

*حد فاهم هو ليه نقلنا الهبل اللى بيحصل هنا للمغرب؟

*هل الموضوع يستحق فعلاً كل هذا الجدل ورفع السعر بهذا الشكل الغريب؟

*حد شايف ان المبالغة اللى فوق ده مش واقعيه باللى بنسمعه فى الصفقة بنشر كلمات كالتمويه والمناورة وبين مفاوضة رئيس النادى بس او اقناع الوكيل بس او اختفاء اللاعب نفسه؟

*ليه شغل العيال الصغيرة فى الاستعراض على صفحات الفيس بووك بالمباركة فى صفقة لم تتم او على التليفزيون او ما شابه ،هل بهذه الطريقة يتم الاعلان عن صفقة مهمه مثل هذه؟

*اكمل ما حدث بعد المشهد الاخير بطريقة تخيلية شيزوفرينية؟

*اذا تركت لى الاجابة،اتمناها المخابرات الزملكاوية تستطيع ان تجيب العملية "اى فو نا" للقاهرة ليس لمهارة اللاعب الذى لم اشاهده او بسبب حنكة المجلس،الموضوع واضح انه عند وشماته لا اكثر ولا اقل وانا راجل بقيت صاحب مرض.

*ولكن ربما لو تركت لى الاجابة بدون امنية،ربما سنسمع تتر فيلم " طأطأ وريكا وكاظم بيه" فى الخلفية بتاع " توتوتو توتوتو " ونجد اللاعب يرتدى تى شيرت الفريق البولندى وهو بيعمل باى باى للاتنين زى ريكا ما عملت فى الجوز!!

*اخيراً..ديه حاجة بقت تقرف !

علاء عطا #كل_سبت

Comments ()

ولماذا لا نبيع أيمن حفنى للأهلى ..؟ علاء عطا

Written by
Published in علاء عطا
السبت, 13 حزيران/يونيو 2015 23:34

 بتقول إيه؟ عنوان مستفذ،لا ياراجل! بتتكلم جد،قول والله، والله!لا بتكلم جد،صايم ولا زى كل موقف،مش فاهم؟! مش فاهم إيه؟ مش فاهمنى أنا؟ إيه،العنوان؟ أه،بتاع أيمن حفنى نبيعه للأهلى،ده غريب!بس انت فاهم الخناقات بتاعة الصفقات ورئيس عاوز يقيل مدير فنى قرب ياخد بطولة وصعد مجموعات وبيحضر للجديد وبيخش صفقات بواخه وممضى 15 لعيب عال 15 بتوع اللى فات و و و و ،كل ده عادى ووقفت عالعنوان؟!

عارف العنوان اللى فوق ده قصاد كل العناوين اللى بنشوفها يوميا ولا حاجة،كل اللى أقدر أقولوا إنك مع مرتضى منصور،مش هتقدر تبطل تحط قطرة فى عينيك،ومع الزمالك مش هتقدر تتعلم من تكرار نفس الموقف 10 مرات،ضريبة حب وعشق النادى ده،بس للاسف جمهور الزمالك غصب عنه اضطر أن يشارك وساعات بيبقى ليه تأثير مباشر فى المشاكل ديه،ولازم كلنا كجمهور ونادى يقف شوية مع نفسه،خلونى اقولكم بعض النقاط اللى أحب ا

سجلها بعد إذنكم بدون فرض رأى على أحد. • مين صالح جمعه؟مين السولية؟ مين ايفونا؟ لعيبة صح،طب قولى كده مين اسلام عوض؟ مين عبد الله السعيد؟ مين شريف عبد الفضيل؟ اه قبل ما انسى مين اجوجو؟ لعيبة تانية برضوا،حصل بلاوى يوم ما خسرناهم،ويوم برضوا ما حسمنا صفقاتهم،بس صفقات بظروف مبالغ فيها فى الآخر التاريخ كله بيقول بتفشل.

• انت بتقول مين صالح والسولية عشان الاهلى قرب يحسم او حسم الصفقة؟عاوز تاخدها كده براحتك،عاوز ترد عليه كفنيات مفيش مشاكل بس احنا اصلاً قاعدين بنتخانق على انها نهايات العالم،وماتعلمناش ولا مرة ان اللعيب اللى بنتعشم فيه زيادة عن اللزوم بشكل مبالغ ده بينتهى بفشل،بس معلش لازم نضايق نفسنا وخلاص ونحسس الطرف الاخر انهم خلصوا مع ميسى!

• سؤال سريع كده؟بالله عليك ياللى قالبها مناحة من دلوقتى على ايفونا لو راح الاهلى مثلاً،قولى كده كام ماتش شوفتوا كاملين للاعب،ماتش مش فيديو،وقولى كمان فاكر لاعب الحرس نداى اللى كان هداف فى الدورى المغربى وجه ومشى ولا حد سمع عنه،بلاش مناحة على السمع بالله عليكم!

• هو الزمالك جاب مين السنة اللى فاتت؟باختصار صفقات نحتاجها وصفقات نعلم بيها عالاهلى،بس كده،دلوقتى بنشتم صفقات كتير لان هناك من جاء دون اساس ولم نبحث عن النواقص،نجد مراكز بها تخمه واخرى ناقصة بوضوح والخلاصة موسم معقول استطعنا العودة من جديد ولكن هل يجب ان تكون الصفقات قطع عالاهلى فقط؟ ربما تكون ناجحه هذا الموسم للعودة لكن موسم البناء تم لذا يجب ان يكون الموسم الجديد موسم زيادة القوة ليس إعادة البناء.

• تخيلوا مثلاً اننا لم نتعاقد مع صفقات تعوض رحيل عبد الشافى وجلسنا طول الموسم نتجرع مصيبة هذا،وبنفس هذا المبدأ سنفعلها هذا الموسم لو لم نتدارك نفس الخطأ بتحديد الاحتياجات التى يحددها فيريرا ثم يتم ترشيح اسماء ثم يتم التفاوض والتعاقد بعيداً عن هسهس صفقات الاهلى المبالغ فيها!

• دعونا نقول ان الاكثر تخبطاً الان هو الاهلى،هو يريد ان يبحث عن العودة وليس نحن،بعد إيهام جمهوره هذا العام انه استقدم المطلوب وظهر جلياً بالاستغناء عن لاعبين دون تعويضهم واعتزال آخرون والان عاد لفكرة التعاقد مع نجوم واسماء لامعه والبحث عن مفرخة الاسماعيلية بعد ان جفت وجاء الدور على لاعب مجتهد اسمه السولية، فلماذا ننقل التوتر لنا نحن؟!

• الاجابة بكل بساطة،أنه لدينا مرتضى منصور،شخص لا يكل ولا يمل ان ينشط برامج التليفزيون، وبدلا من ترك المنافس يتجرع مصائب الموسم،نقل الحسرة لقلب جمهوره وهو ينشر أى غسيل لديه للجميع،ويبدو ان لولا النتائج فقط لانفجر الجمهور فى وجهه!

• هل رحيل فيريرا سيحل الازمة؟الاجابه وهل نفس الشخص الذى حكم على فينجادا بالفاشل منذ عشر سنين و و و و و و هو من يحكم الان على فيريرا؟!هل تتذكرون ما فعله منصور فى فينجادا ورحيله بعد موسم كامل فزنا على الاهلى ذهابا اياباً ولم نخسر مباراة بغض النظر عن فنيات فينجادا وبحثنا فقط عن اللعبه الحلوة فجلسنا بلا لعب أوالقاب لمدة 10 سنين وكل هذا بسبب شئ بسيط الاستعجال!

• هل يعقل ان نحكم على مدرب بعد قدوم 4 مدربين قبله اضافة للاعبين لم يختارهم واعداد لم يخوضه لمجرد ان الاداء لا يعجبنا؟اعقلوها لمرة،هل نترك مدرب فاز بكل مشاركاته وتعادل مباراة فى الدورى وانهزم مباراة واحدة عليها جدل وصعد ونترك من يحكم على رحيله مرتضى منصور؟!

• ايه ده،هو انت يا علاء عاجبك فيريرا؟!ممكن اقول بالفم المليان الفريق حتى الآن لم يدخل نخاشيشى،مش متكيف والزمالك بيلعب،وده عكس ارادتى كزملكاوى،بس اللى اتعلمته ان بلاش الاداء والعاطفه تسبقنى لانه بالرجوع للنقطة الماضية والنقطه 8 بقول ان لازم نصبر عشان الراجل يحدد نواقصه ويحددها ونتعاقد عليها ويستغنى عمن يراه بصلاحيه ويشرف علي معسكر الاداء وخصوصا مع تلاحم الموسم وبعدها نرى،إما أن نحكم الآن بكل مساوئ الفريق فان الخيار الامثل هو استمراره،وتذكروا اصلا رحيل جوزيه كان ازاى وليه ورجوعه كان ليه وعمل ايه؟مع الفارق اصلا بين اسم جوزيه قبل قدومه للاهلى وفيريرا ذو السمعة الاوروبية الكبيرة.

• مرتضى منصور لا يستمد قراراته غير من الجمهور،هو تعلم هذا فحينما قرر اقالة حسام شعر انه اخطأ باستقدامه والان هو يستمد الثقة من عدم رضاء الجمهور عن الاداء بل اؤكد لو اخترقت مخه فانه يتمنى فشل الفريق ليرحل فيريرا،فرجاء خاص لجمهور الزمالك ماتشاركوش فى المسلسل ده.

• من يشجع تجربة ميدو الان إذ فجأة ممكن نهدى بس شوية ونركز كده وبعدين نعرف ان ميدو عمل حاجات كتير اوى غلط ولازم يقعد بره المعبد شوية عشان يعرف يرجعله تانى،بعد اذنكم نهدى،الموضوع مش عاطفه،صدقونى.

• كفاية ارجوكم فكرة رحيل واستقدام مدربين بالسهولة ديه،اقسم بالله الزمالك هيفقد سمعة كبيرة فى حالة تفكير اى مدرب فى حالة ترشيح اسمه للزمالك،ارجوكم!

• معلومة سريعة،اقسم بالله نفس الاشخاص اللي كانت متحمسه لاسماء معينة السنة اللى فاتت هى نفس الاشخاص اللى بتسب وتلعن فيها دلوقتى!

• بلاش تحقير فى الصفقات اللى مابتسمعش زى محمد جمال لاعب الترسانه بغض النظر انى ماعرفش ابعاد الموضوع بس افتكروا مصطفى فتحى عمل ايه وجى منين وافتكروا برضوا قطة وفشلوا يعنى كل صفقة سلاح ذو حدين وديه قاعدة اى شئ ليه احتمالين.

نحافظ على قوام الفريق واحساس اللاعبين بقيمتهم مش عرضهم للبيع والاعارة والاستعراض على الشاشات بالملايين بهذا الشكل الفج،كفاية.

كفاية مبالغه فى حجم اللاعبين حقيقة،احنا المواهب الحقيقة فى مصر قليلة جدا،والصفقات اللى مش عليها ضجة هى اللى اثرت بشكل مباشر السنة ديه عالزمالك،الشناوى وجبر وكوفى ومرسى خير دليل.

ارجوكم كفي جلد للذات واعلموا اننا لو حددنا نواقص الفريق التى تتمثل فى حوالى 6 لاعبين سيتم بناء فريق حديدى بالمعنى الحرفى،فلو استقطبنا المراكز الناقصة بشكل هادئ بدون زخم الصفقات بشكل حرفى يجعل اى لاعب قادم يفهم انه ذو قيمة وليس قطع طريق للاهلى وقتها فقط ستجدون لاعبين تستحق شرف ارتداء الفانلة.

كفى فذلكة النادى محتاج فلوس،فمن دبر فلوس السنة اللى فاتت،قادر بقليل من الحنكة يستقطب لاعب صح وبسعر صح بدون مغالاه ومنطقية،مش السولية اللى يتقال انه مطلوب 10 مليون وكمان 3 لاعبين،نعقلها قليلا.

اخيراً بلاش كل زملكاوى يعمل حكر على رأى الآخر،لانى ارى مهازل حقيقة فى الموضوع ده لانه ببساطة كل رأى قد يحتمل صواب 1% وقد يكون هو الرأى الاصح بين كل الاراء الاخرى.

رسالة اخيرة اوجهها للجميع

،اذا كنت تتفق وترفض ما قيل فبنفس اى منطق دعونا نبيع حفنى للاهلى اذا عرض علينا 20 مليون جنيه،مستعد ان امنطق اى منطق لو وجدت العنوان خزعبلى،لذا ارجوكم نتحد لان ما تبقى فى الدورى والمعركة الكونفيدرالية تحتاج بالفعل الى اعقلانية ،كفي احساس ان الصفقات اللى بتطير انها نهاية العالم 

افخروا بفريقكم واحلموا باللاعبين التى تسد النواقص،وقتها فقط ستشعرون بالفارق،صدقونى.

قبل الرحيل:

كل سنة وانتم طيبين ورمضان كريم،وانتظروا مقال #كل_سبت على طول ان شاء الله

 

علاء عطا 

 

Comments ()

بكابورت القذارة .. !!

Written by
Published in علاء عطا
الثلاثاء, 10 شباط/فبراير 2015 16:42

 


كان هناك رجلاً عجوزاً يعبر الشارع ببطء باحد الشوارع المزدحمة،واثناء سيره جاءت سيارة بسرعة 120 كيلو فصدمته وفرت مسرعة فمات الرجل وبعدها بايام تم القبض على صاحب السيارة واحالته للنيابة وهنا اعترف ان بائع مناديل بالاشاره هو المتسبب حيث انه له ميول اخوانية ومن خليه ارهابية اثرت على نفسيته اثناء القياده وبالتالى كان مسرعاً،فحدث ما حدث!

خرجت التحقيقات كالاتى،تعويض العجوز بالمتوفى بمبلغ 5 الاف ديه من صاحب السيارة واوصت التحقيقات بالقبض على بائع المناديل بتهمة التحريض على القتل وبيع المناديل فى الاماكن غير المخصصة والتأثير على قائد السيارة ووضعه فى سجن مشدد الحراسة و حبس صاحب السيارة سنة مع ايقاف التنفيذ ودفع الديه والزام اهل العجوز المتوفىبدفع مبلغ 10 الاف جنيه اصلاحات للسيارة وذلك نظراً لعبوره من منطقة غير مخصصة للعبور!

عزيزى القارئ،مش مشكلة تصدق القصة لانها من وحى مؤلفها،قد تصدقها لمجرد ان استوقفك كلمة ارهاب، ميول،خليه،اخوان،ان تسمع اى كلمة مما مضى فضميرك استراح ان الجانى ليس بالجانى والقضية اصلا واضحه!

فى مجزرة الدفاع الجوى،كان يمكن لكل زملكاوى منا ان يتواجد،شخصيا عرض على الحضور من اطراف عديدة،ولكنى وجدت صديق شخصى رفض فكرة الاستمارة وقال لو حدث لاقدر اللهشئ يمكن لكل من مضى على هذه الاستمارة ان يذهب شمال شرق الشمس،نعم،ربما ولما لا فكل شئ مباح وستجد السكاكين مسنه قبل ان يتم البحث عن الجانى الحقيقى،لذلك قررت عدم الذهاب حتى وان لم يوجد استمارة لكى اطمئن ان هناك من تعلم كيف يدير مباراة من الخارج؟

الحماس الذى كان عليه مشجعى الزمالك للحضور اقوى من حماس طفل صغير يحلم بلبس العيد،من كل مكان وجدت صديق ذاهب للاستاد وهو متحمس للقاء اجمل شئ يعتبره وطن فى وطن بلا دفء لذا فحماس الجمهور لم يكن يستحق ان تكون نهايته موت،النهاية قصة درامية ستسجل وسيخرج منها 20 برنامج بموسيقى حزينه فى الخلفية لاسر المتوفيين ولا مانع من الحسبنه على الارهابيين سبب الماساة!

ان تقول توصياتك منذ احداث بورسعيد لحضور الجمهور هو تركيب الكاميرات الثابتة والمتحركة للمراقبة، وتعلية الأسوار الحديدية بين المدرجات، وتوفير بوابات إلكترونية للتفتيش وكشف المتفجرات والألعاب النارية،ونجد فى النهاية جحر يمرون منه فتزيد الطين بله بتعاملك الغير محترف معهم فتتناثر الجثث على طرقات الاستاد فهذا تقصير منك انك لا تجيد شئ سوى التبرير فقط!

ادارة الازمات لا وجود لها فى بلد عشوائى،انت لم تفاجأ بوجود الاف الجماهير امام الاستاد،بل المنظر لا يوحى مطلقاً ان هناك 5 الاف مشجع فقط او 10 ولكن تجاوز الثلاثين،وهنا يوجد ازمة عدد زائد،هل جاء بفكر احد اللواءات مثلا كيف ستدار هذه الازمة؟هل فكر احدهم برفق كيف تكسب وتدير الازمة بمنتهى الذكاء؟هل فطن لذهنك فقط ان نفق حديدى متجرد من كل الانسانيات هو الحل وهل وهل وهل؟ اكيد لن يفهم احد هذه السطور.

الازمة اذا رأيتها فى المشجع،فانت لم تحاول حوار احد،انت لم تطبق اصلا اى شئ منذ مجزرة بورسعيد من ابواب استاد لكاميرات ترصد المشاغب او المتحفز للدخول دون تذكرة او عمل اى شئ يوحى انك مؤهل لشئ،انت اخذت اسهل قرار وهو التحدى والتعنت وانت تعلم انها ستؤدى لمصيبة،انت استسهلت المصيبة اسهل بكثير من القرار السهل وهو الحوار،لو وقف لواء شرطة واحد بمنتهى الذكاء لادارة الازمة،تحدث بكل صراحة ان لا دخول لغير حاملى التذاكر ويرجى من يحمل تذكرة الوقوف جانباً حتى يتم دخولهم وانهسيتم محاولة دخول من ليس لهم تذاكر فى النهاية ولكن بعد احقية دخول حاملى التذاكر حتى وان لم يفى بالوعد،لكان الوضع مختلف.

ماذا قدمت الوزارة من الاساس ليشعر الجمهور انه فى امان،لاشئ،كنا فى الماضى نسخر من قبلات الخيول،الان قفص حديدى مع اعداد رهيبة دون مبرر فصارت جاهزية الازمة تنتظر مجرد فتيل صغير لاشعالها،فتمت،قل ان الجمهور البادئ او الداخلية التى كان لها رد الفعل ولكن دعونا نصل لقمة الازمة ماذا لو حدث ودخلت الاعداد الزائدة مثلا؟!

وقتها سيعاقب الزمالك وحده سواء مالياً او بعدم لعب المباراة اصلاً،ولكن ليست الارواح،وقتها ستتخذ الوزارة انها لن تتعامل مع الجمهور وستأخذ القرار الذى يريحها بعيداً عن تعنت ووهم هيبة الدولة والكلام الذى اصبح مسترسل فى بكابورت القذارة المسمى بوسائل الاعلام تقف مع اى شئ ليس على حق لمجرد ان المصالح تتلاقى فى مكان محدد.

ولكن الحل الاسلم هو قهر الناس ان تصل بالازمة لاسوء نهاية ممكنه،وهنا لم يستفيد احد،ارواح زهقت وضافر اصغر شخص لاقى ربه اطهر من اى كلب استستهل روح انسان او من برر لقتله ،والان تبدأ الروايات تتجه نحو المؤامرة والارهاب وافشال مؤتمرات واسقاط الدولة والهيبة والبلد مش مستحملة والشباب هو الغلط دون مواجهة المشكلة الحقيقة وهى ان المسئولين فى هذه الدولة لا يعترفون بالخطأ حتى وان كانت مباراة كرة قدم!

ستمر الايام،عادى،وسيعود كل شئ كما كان،عادى،حينما تتفق سياسة الدولة مع مصلحتها كل شئ سيصير عادى،فالموت عادى،فقدان الروح اقل من العادى،فقط ستصرف اموال تعويضات لاسر المتوفيين وبرامج لصائدى الماء العكر لدس كلمات المؤامرات والتخطيط لعمل ارهابى وحقارة الجماعات الارهابية والبعد عن اس المشكلة نفسها وهى الاعتراف بالخطأ والحقيقة فى نفس الوقت وذكر الجانى الحقيقى. هل تتخيلون لو سيناريو الموت لم يحدث لكانت الان المشكلة كلها ان الجمهور هوالسبب فقط وسيتم تعليق كل الشماعات عليهم وتحديدا الالتراس،والآن ولأن هناك اموات سواء للالتراس او غيرهم وكلهم مشجعين للزمالك فما المانع ان نبحث عن شماعة اخرى واسهل واذا لم تنفع فلنبحث عن غيرها ونربطها بالاحداث ونعيش ابد الدهر فى نظرية المؤامرة،طالما انت تحكم فابحث عن طوق نجاتك ولكن هنا رب العباد ستحاسبون امامه؟

نقطة قبل اخيرة..قلتها وسأكررها ان المصيبة الاعظم هى هل علم اللاعبون بالمصيبة واستكملوا المباراة عادى؟ والمصيبة الاكبر هل لم يعلم اللاعبون وتكتم من فوق بالمجلس بالامر وهذه مصيبة العن؟والمصيبة التى لا اريد تصديقها،هل قصة عدم لعب عمر جابر المباراة اعتراضاً على وفاة الجمهور حقيقيه وعلم اللاعبون بموقفه فاستكملوا المباراة؟لا اريد تصديق شىء فانا حاولت الا اصدق اصلا الوفيات ولكن انتشار الخبر جعلنى العن كل شئ فيكى ولم استكمل مشاهدة المباراة.

الخلاصة..عاوز تصدق ان الداخلية السبب فى كل القضية،ماشى،عاوز تقول ان الجمهور هو اللى غلطان،ياعم براحتك،بس ماتوريناش بكابورت اسمه بقك بينطق باى حاجة فيها ارهاب مؤامرة اخوان عشان امثالك يستحقون ان يلفظهم الكون!

سحقاً لمن يبحث عن الشماعات،سحقاً لمستنقع وبكابورت القذارة الذى نعيش فيه،سحقاً للغباء الذى يدار به هذه الدولة،سحقاً لمسئول ينجى نفسه من المسئولية ولا يعلم ان هناك رب للعباد،سحقاً لمن استخف بالارواح،سحقاً لتجار الفضائيات بمن يتاجرون سواء بدم الناس او هتك اعراضهم،سحقاً لكل من صدق دوماً جزمة رجليه قبل عقله ،سحقاً لمن استخف بحرمة الموتى والدم وصرنا ارخص من فى البشرية،البقاء لله وانا لله وانا اليه راجعون.

قبل الرحيل: كلنا اصبحنا مرضى ولا استثنى احد!

 

 

zamalek.tv twi ztvz


 

Comments ()

بيكهــــام أوت أوف ذا بـــــوكس !!

Written by
Published in علاء عطا
الأربعاء, 24 أيلول/سبتمبر 2014 00:15

 

أعزائى المشاهدين أهلاً وسهلاً بكم فى برنامجكم اليومى " بيكهام أوت أوف ذا بوكس " على قناة "أوف تى فى "الانجليزية،حقيقة مش عارف أبدأ منين بعد مباراة مانشيستر يونايتد وليستر سيتى واللى اتلب فيها مانشيستر 5 اجوال وبكرر ليستر سيتى ياريته حتى مانشيستر سيتى وده يقودنا الى سؤال "ايه اللى بيحصل فى مانشيستر بعد كل الصفقات ديه؟"،معانا على الهاتف سيادة السير "إفرام مالكولم جليزر " ابن المرحوم "مالكولم جليزر" مالك النادى،سيادة السير ازاى حضرتك؟

إفرام:ويلكام يا بيكهام؟

بيكهام:ايه حضرتك اللى بيحصل فى مانشيستر؟

إفرام:انا مش مبسوط خالص ونهائى،انا مش جايب الصفقات ديه كلها عشان فى النهاية الاقى جونى ايفينز واندرسون بيتنيلوا يلعبوا ،انا لو برينج ماى مازرز تلعب،شى ويل بلاى بيتر ذان وات اى ووتش توداى.

بيكهام:سو سيادة السير ، انت شايف ان سبب اللوسيز اللى بيحصل اشراك ايفينز واندرسون؟

إفرام:بص يا بيكهام،انا بيج لوير فى انجلترا،زميل الكلية الملكية المصرية للحقوق،نقيب محاميين انجليز سابق،رئيس لجنة اندية،امين طلبة حقوق كامبريدج،ابن ملكولم جليرز مالك مانشيستر بخبرته،يعنى خبرتى وقيادتى سواء قبل بابا او معاه او بعده بتقول ان جوز اللاعبين دول ما يلعبوش تانى

بيكهام:بس حضرتك ديه رؤية مدير فنى؟

إفرام:يعنى ايه يعنى،يعنى انت عايز تقول انى مافهمش كورة يا بيكهام،احترم نفسك وافتكر ان سيديهات فيكتوريا مراتك كلها معايا،انت نسيت نفسك ولا ايه!

بيكهام:جرى ايه يا سيادة السير فيه ايه؟!سؤالى واضح فيه مدير فنى وحضرتك رئيس نادى ايه جاب سيرة فيكتوريا والحوارات ديه،مع العلم ان فيكتوريا اصلا لو عملت سيرش على جوجل هيظهر كل حاجة مش محتاجة سيديهات،حضرتك دلوقتى هتعمل ايه؟

إفرام:بص يا بيكهام،ايفينز واندرسون مايلعبوش تانى،انا مش شارى صفقات قد كده عشان فان جال يلعبهم،انا بقول اهوه،مويس نفسه مكانش معاه الصفقات ديه ومع ذلك دعمناه للنهاية بس فى الاخر جيبنا فان جال وجبتله فالكاو وبليند وكام صفقة،فماجيش فى النهاية الاقى ايفينز واندرسون اللى بينرفزنى اصلاً يلعب.

بيكهام:طب حضرتك شايف ايه؟

إفرام:من الاخر،فان جال يلعب باتنين فراوده صراح،رونى وفالكاو ووراهم فان بيرسى،يلعب كده اهلاً وسهلا مايلعبش يروح،وايفينز واندرسون ماشوفهمش تانى،ورافييل ماست كات هيز هيير عشان مانزلش اكت هيز هير بنفسى.

بيكهام:طب حضرتك خوان ماتا؟

إفرام: بلا خوان بلا سلف،مش ناقصه راخر،اهو يلعب احتياطى.

بيكهام:اى كانت بيليف تدخل حضرتك المباشر فى شؤوون مدير فنى؟

إفرام:احترم نفسك واعرف انت بتكلم مين،اى ويل فاك انى وان ويل سيي وات يو سيد اجين..........

تيت تيت تيت

بيكهام: نو نو نو،سورى مستر سير،اقفل الخط يا جونى بعد اذنك،انا عاوز اقول ان ماينفعش ابداً يا مستر السير يوصل الموضوع لشتيمة وتجاوز،وبجد عيب جداً اللى حصل ده،نطلع لفاصل ونرجع

فااااااااااااااااااااااااااااااااااااااااصل

بيكهام:عودة من جديد،انا جالى دلوقتى منشور مضحك الحقيقة من قناة بى سى بى فى برنامج" الكورة مع شيلتون" بيقول الاتى لشروط إفرام مالك منشيستر لبقاء فان جال:

اللعب باتنين فراودة

استبعاد ايفينز واندرسون من الفريق ورجوعهم لما يجددوا.

فى حالة لعب فان جال براس حربة واحد سانزل للملعب ويرحل فوراً.

منع دخول بيكهام نادى مانشيستر يونايتيد.

ديه كانت اهم قرار سيادة مستر السير افرام،عاوز اقول حاجة،بيكهام قدم عمره كله عشان مانشيستر،بيكهام اللى لعب فى صفوف ناشئيه وكبر واترعرع فيه،خد دورى وكاس وكاس كؤووس وكاس الملكة واحترفت ودخلت للنادى فلوس قد كده وبحب النادى فيرى ماتش فرووم ماى اتشايلد هوود،وللاسف معاليك جى تقولى مش داخل النادى،النادى مش فيليدج اهلك ولا بمزاجك واياك تفتكر يا سيادة المستر السير لما تصدر قرارات زى ديه حتى لو اتطبقت انى مش وييل انتر ذا كلوب اجين، بالعكس انا هدخله هدخله حتى بعد قيادتك عشان الناس بتعرف تميز مين اللى ادى النادى ومين لأ،واياك تنسى ان بيتر شيلتون اللى انت روحت تقولوا قراراتك عنده كنت متخانق معاه لولا سيادة الملكة ما صلحتكم،ياللا خلونا ساكتين..

نروح بقى للكورة العالمية ونطلع لمصر،فاز فريق الزمالك على الجيش 6-1 فى مباراة اشبه ان تكون مباراة استعراضية اثبت فيها فريق الزمالك انه اتغير كتير فيها عن مباراة السوبر.

.................

......................

............................

والى هنا تنتهى حلقة اليوم من برنامجكم "بيكهام اوت اوف ذا بوكس" ونلقاكم غداً فى نفس الميعاد..جوود باى.

والسؤال الآن عزيزى القارئ..

ليه دايماً فى برامج برة مش هنا طبعاً ،المذيع بيجيب لعيب ويفضل يسأله على ابوه وامه اللى ماتوا لغاية ما يخليه يعيط بالعافية؟

ليه برامج برة بتاعة الكورة زى " جود افينينج انوار" و "الكورة مع شيلتون " و"بيكهام اوت اوف ذا بوكس" برامج كلها حشو وهرى وخلاص مافيهاش كورة.

برنامج " ذا بوول ايذ نوت ويز افيفي" ماشافتش النور وبرامج حمضانه زى اللى فوق ديه هى اللى بتتصدر المشهد؟!

ليه الكورة بره شوية صراعات وخناقات ومفيش حد عارف حقوق البث من قبلها بفترة بدل ما الكل بيحتاس هو الماتش على قناة "اوف ذا بوكس وان ولا +2" ولا قناة "بحر المانش سبورت"؟!

ليه بيشغلوا اغنية حزينه فى الخلفية وهما بيستضيفوا "ديفيد لويز" وبيشغلولوا تريللر عن جماهير تشيلسى بعد ما مشى وسابهم؟

ليه نادى ارسنال حاطيت جلاد احمر مخبى بيه اعلان "اتصالات" اللى ماينفعش يظهر بدل ما يعمل تيشيرت بدون اعلان وخلاص بدل ما هو ساحب كل الجلاد الاحمر اللى فى سوق وموسم الدراسة اشتغل والتلاميذ محتاجه جلاد؟

ليه قناة " بحر المانش سبورت " مايجيبوش 3 لمبات نيون زيادة فى الاستديو ينوروا بيها بدل ماهو استديو كئيب وشكله يقرف ومضلم؟!

واخيراً السؤال الاهم فى الموضوع ده كله..؟

ليه حوارات نادى مانشيستر زى اللى تمت بين بيكهام وبين سيادة السير مالك النادى بقت علنيه ومخذية بالشكل ده،ليه الجمهور مش قادر لا يفرح بصفقاته واهراماته واللى على السد وبقى مكتوب عليه مشاكله كلها تليفزيونية؟ليه مالك النادى بدل ما طلع عمل الشو ده كان لم اللعيبة بعد الماتش وعنفهم واجتمع بالجهاز وعرفوا مشاكله معاهم بدل الهم اللى الجمهور مابقاش قادر يتحمله ده؟ليه هتخلى تاثيرك المباشر وغير المباشر مادة دسمة للاعلام وتخلى السكينة مسنونة عليك على طول؟ليه وقت المشاكل نلاقى فان جال بيقول على مويس انه درانكار ومويس يرد عليه ان فان جال انه كان بيسيب لعيبة هولندا مع ساقطات فى المعسكرات وهو عارف؟مش الافضل وقت الشدة نتكاتف مش ننشر الديرتى تيشيرتات بالطريقة ديه؟!

ياريتنا نتعلم من مصر حاجة نستفيد بيها بجد..ياريت !!

Comments ()

عميـــد أم عنــــيد , مقال لعلاء عطا

Written by
Published in علاء عطا
الثلاثاء, 19 آب/أغسطس 2014 20:01

 

 


عزيزى الزملكاوى،إذا كنت متعصب لاشخاص قبل الزمالك فلا تغامر بقراءة مزيد من السطور القادمة فحب النادى الذى يجمعنا حتى وإن إختلفنا فى تناول مواضيعه لا يجبر أحد على تمجيد أشخاص على حساب ناديه فالقصة ببساطة الآن أن الجمهور أصبح تائهاً قبل أى وقتاً مضى فأصبح مكتوباً عليه بدلاً من تشجيع ناديه فقط أن يفكر ويستقطع جزء كبير من حياته لمشاركة النادى فى التخطيط فيتشتت قبل التركيز فى مهمته الكبرى الاساسية "التشجيع"!

فى رحيل ميدو وقدوم حسام علامات استفهام كثيره،اسمحلى أن اسردها فى نقاط دارت بمخيلتى اجلت كتابتها بعد ماتش فيتا حتى لا يتهمنى أحد ببث الاحباط مع استلامه المهمة.

أولاً،هناك مفاهيم خاطئه عند الناس

فليس معنى أن تبدى رأيك أن حسام ليس رجل المرحلة أن تكون إجابتك " يعنى ميدو عمل حاجة! "،السؤال ليست إجابته خيارين فالخيار الثالث كان لابد أن يكون مدرب أجنبى وفى ذلك نقاط كثيرة سيتم شرحها.

ثانياً،أكبر شخص خسر كثير فى هذه المرحلة هو ميدو

،كانت لديه فرصة ذهبية أن يقف ليقيم تجربته بعد الكاس ويقيم ثقة الإدارة فيه وخصوصاً بعد تصريحاته العجيبة بعلمه مفاوضات حسام فيشرف ويرشح بنفسه على"السير الذاتية" للاجانب المعروضين ويصبح كزين الدين زيدان فى الريال فى الجهاز الجديد حتى يتم التواصل بين الاجنبى القادم وبين ميدو وقدامى اللاعبين والجدد وتخطيط المرحلة القادمة،اسف إن قلت ميدو بسذاجة فرش السجادة لحسام!

ثالثاً،لماذا رحل ميدو اصلاً؟

ابوس ايديك،ماتخشش تشوط باجابه واحدة وتقول هو ميدو عمل ايه؟!بص يا سيدى باختصار ميدو اجتهد لكن أفور فى اجتهاده ففشل تجربته بنفسه بعنده فى استخدام اساليب مش لايقه عاللى موجودين فصارت مرحلته كربونيه من طولان،ميدو اصبح بلا حلول فى النهاية وللاسف لانه يحب الشو الاعلامى فاصبح مادة دسمة فرحل.

رابعاً،هو ميدو جيه ليه اصلاً؟

ميدو جيه بعد مرحلة طولانية ماكنش هييجى منها اكتر من كده،حكم الناس ان عالمية ميدو ستكون هى نفسها فى التدريب افسدت كل شئ فأحد أهم اسباب اقتناع الناس هى"عودة الروح"مع ابن من ابناء الزمالك والنهاية ان ميدو فشل رغم مساندة وتغاضى الاغلبية عن اخطائه الا انه لم يقدم شئ جديد فكان هناك حلان إما تغامر اكتر فى التجربة يمكن يكون استفاد وتتحمل عواقبها أو تجيب اجنبى ينقلك نقلة جذرية حقيقية زى ما فييرا عمل كده بس احنا اختارنا اقرب حتة ناشفه عشان نقف فيها!!

خامساً،ايه منطقية اختيار حسام هذه المرة؟

افاجأ ان يجيبنى احد "عودة الروح!"يعنى جيبنا ميدو عشان الروح ومشى فجيبنا حسام عشان الروح تانى!هو الزمالك هيفضل يقضيها روح بس ومش هنتكلم كلام فنيين على راى كابتن فاروق ولو للحظات،القصة ان التكتيك والفنيات واللياقة هى اللى بتخلى اللعيب اصلاً عنده روح يأدى ويبدع زى ايام فييرا ولا ده كان تخيل!

سادساً،طب ايه منطقية الاختيار غير الروح؟

اجد اجابة فورية انت ناسى النقله اللى عملها وقت ما كنا الـ13 وبقينا التانى،لا ياسيدى طبعاً وكلنا ساندنا حسام بس ماذا بعد؟حسام الموسم اللى بعده اختار لاعبين لا يصلحون واصر عليهم بداعى قلة الامكانيات،اصر على استعمال ورقة طول الموسم كشيكابالا دون اى مناورة تكيتيكة فكانت النهاية خسارة الدورى.

سابعاً،هل انا ظالم لحسام؟

ممكن اه،بس نفس مشكلة الجمهور انه اتعامل مع ميدو "العالمى" تعامل مع حسام انه "عميد" فلا ميدو عالمى فى التدريب ولا حسام عميد فى التدريب،مرحلة لاعب الكرة انتهت ولازالوا يتحسسوا سلم التدريب،حسام فى سنته الثانية عاند كثيراً و زاد عداوته مع جهات كثيره وتصريحات ابراهيم زادت المواضيع تعقيداً فخسرنا فى النهاية وللتوضيح ايضاً حسام الوحيد اللى خرج من افريقيا مبكراً وكل المدربين بعده وصلوا دورى المجموعات مع العلم ان وقت حسام كان هناك جمهور!

ثامناً،بكرر السؤال هل أنا ظالم لحسام؟

للاجابة المنطقية ارجع للنقطة الرابعة والخامسة فكل مرة كان يطرح فيها اسم حسام كانت منطقيته الفريق بيقع،بس المرة ديه انت عندك فريق جديد يمكن ان يحصد كل البطولات لسنوات لو تم التخطيط له بشكل صحيح،حسام لازلت اصمم انه يخطو التدريب فحتى حينما جائت فرصته الذهبية ليمثل الاردن فى كاس اسيا طموحه تقلصت لعودته للنادى حتى وان كان الزمالك كبيراً فالطموح نفسه يقلقنى لذلك يقينى أن هذه المرحلة بالذات ليست مرحلة حسام لان الطموح هذه المرة التخطيط وهو ما يفتقده حسام!

تاسعاً،هل انا بصطاد اى غلطة لحسام؟

ممكن،ليه لأ،لأن حسام فى نظرى"عنيد"،حسام تخطى مرحلة العمودية مع اعتزاله،مرحلة التدريب تحتاج للتعلم حتى تصبح شئ عظيم،لا اسمك الكروى ولا خبرة الملاعب فقط ستفيدك فحسام عنيد وعنده يجعله دوماً لا يراجع نفسه،حسام بدأها باختيار طارق السعيد ورضخ لموضوع رفض الجمهور ثم عاند مرة اخرى واصر الان ان لم يكن طارق انضم فعلياً مع كتابة هذه السطور،حسام عنيد لانه يكابر فى بعض الاحيان فى اعترافه باخطاء كثيرة اقترفها ويصر على لوم لاعب او حكم او ظروف،عنيد لانه لم يتستفيد باخطائه كلاعب ولازالت عصبيته تسيطر عليه فى التدريب فهناك شعره صغيرة بين دب الروح والتنطيط على الخط فالتدريب ليس عصبية طول المباراة ولنا فى فييرا درس!

عاشراً،إنت شكلك مش عاوز حسام عشان بتحب فييرا؟

فييرا بالنسبة لى نقله نوعية فى النادى،عرفنا ان التدريب ليه اشكال تانية زى ان ارتفاع اللياقة تبنى فرق،تغيير التكتيك من مباراة لاخرى يمكن ان يكون باساليب اللعب وليس تغيير الاسماء،لكن التجارب علمتنى إن اى تجربة ناجحه فى الزمالك لو اعيد تجربتها من جديد دوماً تفشل،اسألوا كابرال،هنرى ميشيل،كرول ان اعتبرناه نجح،لذلك فعودة فييرا ليست خياراً مطروح بالنسبة لى لانى كنت مصمم على استقدام مدرب اجنبى جديد بفنيات تعيد بناء المعبد مع الصفقات الجديدة لذلك فحسام سواء اعتبرته نجح اول مرة او فشل ينطبق عليه نفس المنطق السابق.

الحادية عشر،هل تتقبل ان ينضم اينو ومحمد صديق بالمرة للجهاز؟

اتعجب من تقبل البعض لطارق السعيد تحت اى مسمى للجهاز الفنى فحينما نتقبل حتى لاعب قادم من الاهلى فان مصلحة الملعب ربما تقتضى مع اعتراضى على اسماء كثيرة اهانت الزمالك وانضمت فى حين من هو طارق السعيد العلامة التدريبية التى ستضيف على النادى؟وأعجبنى تعليق صديقى احمد عفيفى "الباب اللى خرج منه حليم ومدحت هيدخل منه طارق السعيد"جملة تختصر واقع اليم فهل نتقبل عودة اينو بالمرة وتعيين محمد صديق مدلك لاعبين؟!رأيك يحترم فى النهاية بس انا بسميه "عند" و"عند غير مبرر".

الثانية عشر،الخطر على الجمهور!

الجمهور دخل اصعب مرحلة من تحدى بعضهم البعض ففئة كارهة لعودة حسام وفئة مرحبه وهذا جعل البعض يشكك حتى الصفقات الجديدة التى امتدحها فى البدايه وهذا ان دل فانه يدل على التشتت وعدم تكاتف الجمهور بقوة مع نفسه قبل التكاتف مع الجهاز وهذه مرحلة فى غاية الخطورة وخصوصا مع قدوم طارق السعيد

اخيراً،أسف على الاطالة ولكن،بعيداً عن رأييى المتواضع هل انا ساصبح ضد حسام؟

الاجابة،انا مع الزمالك بعيداً عن العند فى اختيار تشكيل او اعادة روح فى لاعب مصمم يبقى كسول،بعيداً عن كلمة عودة الروح والمسميات المعلبة التى أعادت لنادى للخلف،بعيداً عن تصريحات ابراهيم حسن بشأن عفاريت غرفة استاد القاهرة والقاء اللوم عالظروف و و و ،بعيداً عمن سيعلق اى شماعة على عدم اختيار اللاعبين الجدد،بعيداً عمن سيبرر اختيار طارق السعيد،بعيداً عن الوقوف على الخط بطريقة عصبية اعتقاداً انه سيولد شيئاً جديداً بعيداً عن فنيات التدريب،اريد زمالك جديد،اذا حققه حسام،ساحييه بعيداً عن اى معادلة فلسفية فمصلحتى فى النهاية هى الزمالك والشماتة مستحيلة مع معبد مشروخ كالزمالك،فان تغيرت المعادلة سأكون اول من يعتذر عن رأييى لان مصلحة الزمالك فوق الجميع.

قبل الرحيل:

رئيس الزمالك قال فى مرة"اى لاعب هيحلم بيه اى زملكاوى أنا هجيبه" انا بحلم دلوقتى بحلم واحد "انك يوم واحد بس تريح وماتطلعش فى التليفزيون!"

علاء عطا

 

zamalek.tv twi ztvz


Comments ()

المباريات المقبلة

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors