ماتش امبارح : العربي سخصية

Written by  محمد خليفة
Published in محمد خليفة
الجمعة, 31 تشرين1/أكتوير 2014 17:23
Rate this item
(3 votes)
حازم امام حازم امام ماتش امبارح : العربي سخصية

Advertisement

في ماتش الاتحاد علي الورق المفروض كنا نبقي احسن من ماتش سموحه شوية فرضيات زي ان باتشيكو قعد اكتر مع الفريق .الاتحاد مش مقفل زي سموحه .عناصر الاتحاد اقل من سموحه. بس علي ارض الواقع الزمالك قدم ماتش اقل من سموحه غياب حفني اللي هجمات كتير بتبدا انه يعدي واحد علي واحد فتبتدي مساحات ولعيبة تتحرر بجانب فكرة باتشيكو انه بيلعب ماتش اواي فاكرنا بقي في دوري بجد وبتلعب بره ملعبك وجمهور منافس والشغل ده فالدفاع ما كانش هاي لاين زي ماتش سموحه وكان متراجع شوية ..

ده اللي جد عن ماتش سموحه اللي اصلا الاداء فيه ما كانش واو قوي يعني كان مجرد تحسن عن اللي قبل كده فلما تتراجع شوية عن اداء سموحه فتبقي النتيجة اداء اقل من المتوسط .. اكتر حاجه مزعلاني ان لغاية دلوقتي مش بنلعب الكور الثابتة كويس بتتلعب تأدية واجب في المنطقة من غير ما تحس باي مجهود فيها رغم انها مع التسديد من برة المنطقة المفروض اكتر حاجة هنعول عليها لفترة علي ما يحصل انسجام ويحصل ان باتشيكو يبانله بصمة هجومية ..

معانا واحد طول السنة السودة زي علي جبر وواحد التيك اوف بتاعه عالي زي كوفي ومش عارفين نعمل اي تريك تفضي حد منهم ونقطة علي جبر دي برضو تفقع الراجل بيطلع وتحسه مكسوف يعمل تيك اوف عالي يركب بيه الكورة يا جدعان حد يدربه ده لو نط عالي شوية هيبقي اطول من نص اجوان مصر وهما بايديهم ..

طارق وابراهيم لازم يلعبوا راسي شوية لازم يبقي في خمس ست ياردات بينهم طوليا لازم حد يبقي فوق حد نستفيد من قدرتهم العالية في الاستخلاص اننا نقطع الكورة بضغط مبكر في التلت الدفاعي للمنافس ساعتها بتتاح فرص كبيرة لو خدت الكورة من الخصم وهو في موقف مش منظم دفاعيا حقيقة كان في محاولات لقطع الكورة بدري والتحول السريع من الدفاع للهجوم بس كلها ما كملتش .. الغريب ان تغير طارق بتوفيق صاحبه الي حد ما ان ابراهيم صلاح خد خطوتين قدام توفيق بس الموضوع ده ما كانش محتاج تغير لان ده كان ممكن يتعمل بطارق عادي عموما التغير ده لا يمكن فهمه غير في سياق ان باتشيكو بيكتشف لسه الفرقه ويمكن شافله ماتش قديم ولا لقطة في التدريب لقي توفيق بيجري ولا حاجة لقدام قالك ده نوع مختلف عن طارق وابراهيم لما نجربه ..

شخصية اللعيب من اهم الحاجات اللي بتؤثر علي مستوي الفريق ككل وجود لعيب صاحب شخصية في كل تلت من الملعب ضرورة قصوي علشان كده لو تخيلت ان الامكانيات الفنية لكوفي زي جبر زي اسلام جمال او ان ابراهيم صلاح زي طارق حامد زي توفيق فده تصور فيه غلط لان اهمال عنصر القيادة والشخصية للعيبة زي كوفي وابراهيم صلاح بيبوظ المعادلة وده يمكن اللي مبوظ معادلة التلت الهجومي افتقاد التلت كله للعيب صاحب شخصية ..

كورة الجون مثلا بدأت باصرار ابراهيم صلاح وقدرته علي الاحتفاظ بالكورة تحت ضغط وطلعها من رجله سليمة لسمير من غير ما تتقطع ..

حازم كابتن الفريق علي الورق بيواصل تقديم اداء فيه تلت غباء العالم القرارات كلها غلط اللي تتشاط تتباصي واللي تتباصي نخش فيها نعدي من بطن الدفاع وفواصل من العك المستمر تحسه بيقدم كورة عندها امساك ..

علشان كده بدل السؤال الوجودي عن مؤمن وجدواه انا شايف اننا الاول نحسم امر حازم وهل هو مؤهل لدور اساسي ولا نشوفه دكة ونشفلنا حل تاني افيد علي يمين الملعب .. عيد قدم اداء معقول عيد كان كويس في دجلة قبل ما يضيع البلن وكان معقول في سموحة في الشوية اللي لعبهم وامبارح كان معقول هو لسه برضو ساعات تحسه بيعتل وعاوز يلعب لعب نجار مسلح ويخش يفرتك المدافع مش يلعب السهل بس هو برضو بيعمل باصات مؤثرة كتير بتبقي بداية لهجمات وطلع سمير صح في اكتر من موقف ..

خالد قمر لازم يريح ويفصل شوية يعني طالما مهاجمينا ما فيهمش حد مقنع يبقي نجرب حد غيره يمكن يظبط نشوف احمد علي شوط كده يمكن تكون ايام العدة بتاعته خلصت وبقي جاهز للتخصيب.. باسم مرسي برضو نزل ما قدمش حاجه بس هو قدمه قدم خير والجمهور مستريحله والهمبكة بتاعته ماشي حالها ..

سمير لسه بيقدم مستوي معقول وبيتحسن بالتدريج دفاعيا ادانا اكثر من المتوقع وبيلتزم بالارتداد ومش ثغرة هجوميا كنا مستنين منه اكتر هو لعب كةرة كويسة لعيد كانت هتفرق معاهم الاتنين جدا لو جات جون بس برضو في مواقف تانية كان متاحله يعمل اكتر من اللي عمله بس لسه انا مستنيه بعد ما تظبط معاه في صناعة او تسجيل جون ساعتها ثقته واداؤه هيتحسنوا ..

مؤمن زكريا اتحول لسؤال وجودي زي اللي مش بنلاقي ليهم اجابات وتقعد تفكر فيهم تلاقي نفسك بتقول استغفر الله العظيم ومقفل الموضوع .. بجد الواحد ما بقاش عارف ده يلعب ولا يريح ولو ريح هيريح لمين يعني مع العك اللي بيعكه حازم واداء الطالب الازهري بتاع معروف يوسف ومافيش لعيب واو علي الدكة يعني نخلينا بقلب جامد نقول يلعب علي حساب مؤمن خصوصا كمان لعبنا براس حربة واحد فبنحتاج حد يجي من ورا يخش المنطقة وده تقريبا اغلب لعيبتا بتعتبرها عيب يمكن عيد لما يبقي فيه نفس لسه محتفظ بثقافة لما كان عنتيل في الحرس وبيخش المنطقة وكان هيسجل بس للاسف اوقات كتير اللياقة والسرعة ما بيسعفوش وحازم اللي المفروض يخش راس حربة تاني اوتامتيك في لحظات زيادة سمير المرتين اللي دخل المنطقة عرضية مؤمن الشوط الاول حطها وحش قوي وراح حطها في جسم المدافع من غير ما يبص و الشوط التاني فضل واقف مستني عرضية سمير تفوت من الكل وتجيله علي رجله من غير ما ياخد اي خطوة ويروح هو للكورة.. ففعليا مؤمن هو اللعيب الوحيد من نص الملعب اللي زي فرقع لوز بنلاقيه جوه وساكند سترايكر بس في نفس الوقت طول الماتش قرارات غلط ومافيش اي قدرات في المراوغة لخلق مواقف هجومية مؤثرة ومش معقول كل ماتش هستني لحظة تجلي زي تسديدة امبارح خصوصا ان سي في مؤمن ما فيهوش شوط كتير تخلينا مستنين منه انه يظبط كتير.. طيب دلوقتي مؤمن يلعب ولا ما يلعبش ؟؟

استغفر الله العظيم ياعم ما تسالش الاسئلة دي هتخلي دماغنا يضرب اهو لو لعب نشتمه ما لعبش نشتم المدرب ونقول ما لعبوش ليه ..

الدقيقة 76 دقيقة مافيهاش اي حاجة مؤثرة بس فيها لقطتين للشناوي بتبين الفارق بين الامس واليوم تسديدة متوسطة القوة من حدود المنطقة الشناوي بيمسكها من غير ما يترمي بفضل حركة رجل كويسة طريقة التصدي وانه ما يطيرش ويأفلم بتسحب ثقة ممكن ياخدها المنافس من الافلام دي ولما مسك الكورة لعب برجليه لونج باص كويس جدا لحازم هو صحيح حازم عك وطلع بيها الاوت بس الكورة انا ركزت فيها طلعة بالمقاس تبتدي هجمة .. ولسه المريض النفسي طالع يقول ناس في الزمالك خايفين اتالق علشان ما يبانش قرار غلط حضرتك انت لو اتشقلبت في المقاصة احنا معانا الشناوي ...

في حاجات صغيرة قوي بتفرق معايا وبتديني انطباع عن تركيز اللعيب وحماسه وشعوره بالنادي .. افكركم بحاجة موسم 2010-2011 ماتش بتروجيت لما الحضري لعب اول ماتش فكان الكابتن شيكا .. شيكا ساعتها نزل بشارة كابتن شيك كده وعليها شعار الزمالك مش اي شارة بتاعت اي فريق والشارة معدولة تحس انه كان طول الليل بيكويها ويظبطها.. طيب اللعيبة بتنزل بعراقات ايد عادية ها مين نازل بعراقة ايد عليها شعار الزمالك ايوه بالظبط كوفي وابراهيم صلاح العربي سخصية

محمد خليفة

Advertisement


Read 29831 times Last modified on الجمعة, 31 تشرين1/أكتوير 2014 17:38

المباريات المقبلة

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors