دفاع العالمى 2 التمركز الموضوعى

Written by  نور الدين ابراهيم
Published in نور الدين
الأربعاء, 28 أيار 2014 18:18
Rate this item
(0 votes)

دفاع العالمى 2 التمركز الموضوعى

Advertisement


 


اتكلمنا في الجزء الأول عن تكتيك الدفاع المتقدم High backline الي بيستخدمه ميدو، حللنا اسباب استخدامه ومميزاته وعيوبه، وقلنا ليه هو من حيث المبدأ مناسب للضعف الفردي للعيبة الموجودة لكن في نفس الوقت بطء المدافعين مع عدم وجود حارس قشاش بيخلي خطورة التكتيك دا عالية اوي.

وكان اقتراحنا انه يرجع خط الدفاع حبة كمان بحيث يقلل شوية المساحة بينهم وبين الحارس، يفضل High backline بس مش بنفس الدرجة ، والأهم انه يثبت لعيب قدام المدافعين يكون سريع شوية ويقدر يرتد في سباقات سرعة، وبالنسبة لتكتيك التقدم بالباكين للتلت الاخير، يثبت الباك المعاكس لاتجاه الهجمة ميعديش خط الوسط عشان يزود الامان الدفاعي شوية.

طبعا دي حلول تكتيكية للتعامل مع سوء مستوى المدافعين المخزي والحارس ايضا، لكن زي ما اكدنا ان الحل الحقيقي هو نسف خط الدفاع كله، في تقديري الشخصي الابقاء على ياسر ابراهيم واعتبار صلاح سليمان بديل والتخلص من فتح الله بعقده الكبير وعدم التجديد له والاتيان ببديل لعبد الشافي المجهد والذي لا يجد منافسة كافية تحفزه للارتقاء بمستواه.

نكمل المرة دي في تحليل باقي المشاكل المؤثرة في دفاع الزمالك هذا الموسم مع ميدو.

التمركز في الكرات الثابتة

02


من عيوب الزمالك الدائمة، مش جديدة ابدا سوء تمركز المدافعين بشكل عام، وبشكل خاص بقى في الكرات الثابتة، ودا الي هنتكلم عنه في الفقرة دي..

الدفاع في الكورنرات ليه قواعد معروفة بيعلموها للعيال الصغيرة في قطاع الناشئين، لكن يبدوا ان "كباتن" الدفاع عندنا بيترفعوا عن الصغائر دي !.

اولا : تمركز المدافعين بيكون عادة، لعيب على كل عارضة و 3 لعيبة مغطيين مساحة ال6 و الباقي ماسكين ماناتهم. 


03


ثانيا: المفروض وانت ماسك المان بتاعك تبقى واقف بزاوية مايلة بين الكورنر واللعيب، وبمسافة لا تزيد عن ذراع بينك وبينه، عشان تبقى واقف عين على الكورة وعين على اللعيب عشان تقدر تمسكه كويس.

لو وقفت بعيد عن مسافة دراع، هيقدر يهرب منك، لو وقفت عينك على اللعيب بس مش هتشوف الكورة، ولو اتقدمت على اللعيب ووقفت قدامه هيسرقك. لازم تبقى واقف جنبه مايل عليه بزاوية عشان تبقى مالك اتجاهاتك زي كدا :

04

تعالى نتفرج على شكل تمركز مدافعي الزمالك في هدف بتروجيت الاول في ماتش 2-2 الاولاني ونحلل المساخر الي فيه :

05

• شايف صلاح سليمان واقف ازاي ؟ ورا المهاجم وعينه على الكورة مش شايف المان بتاعه اصلا، يعني الكورة دي لو على القريبة كان بسهولة هيقطع قبله ويحطها

• شايف ياسر ابراهيم واقف ازاي؟ المان بتاعه على مسافة اد ايه ؟

• شايف بقية اللعيبة الي واقفة مع نفسها تماما دي ؟

• شايف بقى عبد الواحد، عمل غلطته المعتادة، خد خطوة لقدام وبعدين تراجع ورا ودا طبعا افقده توازنه

الكادر الي بعده :

06

هنا المسخرة تبان بوضوح اكبر، شوف كل مدافع واقف مع المان ازاي، ولا ماتش في دورة رمضانية، طبعا وضع جسم ياسر ابراهيم –الي المان جاله مش هو الي كان ماسك المان- هو الي خلاه لما نط بعد كدا مشفش الكورة، شايف البرنس الي تحت الي بيتمشى لوحده وبرا اللعبة خالص دا؟

شايف بقى محمد رجب وهو جاي من برا معهوش حدا خالص؟ اهو دا الجون . بدون اي مضايقة. وجود لعيبة الزمالك في الكادر زي عدمه بالظبط.

الجون دا بيلخص كل اخطاء الزمالك في التمركز الدفاعي في الكرات الثابته، انا مش عارف فعلا كابتن هشام يكن بيعمل معاهم ايه في التدريبات، بس واضح ان الي بيعمله ملوش نتيجة.

وطبعا لا ننسى جون طلائع الجيش الي هو شفناه ميت مرة، المنفذ يباصي تقوم الحيطة متفركشة يقوم شايط مكان الحيطة عكس اتجاه عبد الواحد ميقدرش يعمل لها حاجة.

طبعا سوء التمركز العظيم دا مش بس في الكرات الثابتة، حتى في الكرات المتحركة سوء تمركز الدفاع خسرنا كتير!.

خاصة فتح الله وعبد الشافي في كسر التسلل!.

ضعف الوسط الدفاعي

07

خط الوسط المفروض انه اهم محطة دفاعية للفريق، الضغط على الخصم والمساندة الدفاعية اهم واجبات الوسط الدفاعي، ودي عندنا فيها مشكلة رهيبة، خاصة نور السيد الي مش عارف بصراحه ازاي اتحول من احد افضل لاعبي الوسط في مصر في عهد فييرا لشبح لعيب كورة ميستاهلش يلعب في فرقة مؤخرة في الدوري حتى!.

تعالوا نشوف مسخرة جون بتروجيت التاني في ماتش 2-2

ادي اول كادر :

08

ثرو باس في مساحة خالية واضح جدا هيتلعب، نور السيد فين؟ على بعد 3 كيلو بيتفرج على المنافس وهو بيلعب الكورة باريحية شديدة!

09

نور السيد واقف برده على مسافة، ولما تتفرج على فيديو الجون هتلاقيه والهيد بيتلعب بيدي اللعيب ضهره !

وطبعا بقية الجون فاكرينه، صلاح سليمان فجأه خد باله ان دي باصه للمهاجم فاتسرق ودخلت جون

كوكتيل اخطاء دفاعية مستحيل تشوفه لفرقة صاعدة لدوري الدرجة التانية في زمبابوي!.

وطبعا الكورة المتكرر كثيرا جدا جدا في اجوان كتير دخلت فينا الموسم دا هي الكور الطولية الي بتتلعب من المنافس من قرب دايرة السنتر لو عنده مهاجم سريع شوية في ضهر المدافعين فالمهاجم يسرق في المساحة لان ببساطه مطمئنين ان عبد الواحد مش هيطلع يغطي!

المفروض ان خط الوسط يبقى ضاغط عشان ميسمحش بكور زي دي لكن بتتكرر طول الوقت ومحدش بيضغط على الخصم :

10

ميس باص معتاد من نور السيد راح للمنافس في مساحة واسعة محدش ضاغط عليه لعب ثرو بجون مباشر

والكورة دي اتكررت في ماتشين بتروجيت كتير ، مختار قاري كويس اخطاء الزمالك ودايما بيلعب عليها صح.

عبد الواحد السيد

wa

وحيد فعليا انتهى كحارس مرمى من 2008 ويمكن من قبلها، حتى مميزاته السابقة في التعامل مع الانفرادات والكرات القريبة راحت خلاص، عبد الواحد بقى بيدخل اهداف متخشش في حارس ناشئ، فمابالك بحارس دولي كبير زي عبد الواحد السيد !

جون فيتا كلوب التاني في ماتشنا معاهم، كورة سهلة وتسديدة غبية في زاوية الحارس مرت منه بشكل كارتوني!

حتى الجون الاولاني المهاجم سدد بغباء في جسم عبد الواحد لكن الحارس "المخضرم" داخل فاتح رجليه والكورة عدت ما بينهم ، اصلا فينيشنج من المهاجم من اسوأ ما يكون ولو اي حارس عادي واقف في المرمى كان صدها!





وجون وادي دجلة التاني في ماتش 2-2، طبعا انا مش هتكلم عن !@#$ فتح الله في الجون دا عشان خلاص قلنا الي فيه النصيب عنه ، لكن كورة زي دي، في غاية الضعف، في غاية العبط وفنص الجون متعديش من تحت ايد حارس "دولي مخضرم" ابدا !





دا غير بقى ان يا عبد الواحد، من اساسيات حراسة المرمى انك لما تصد الكورة، تصدها على برا مش لقلب المنطقة !





بص حضرتك بتتصد التسديدات الي على الجون لبرا كدا مثلا :





وطبعا اتكلمنا في المقال الي فات عن الحارس الي مالي منطقته وبيطلع برا ويغطي، وينهي اصلا خطر الهجمات قبل ما تبدأ زي كدا مثلا :





أو كدة





محمود فتح الله

fat0123

انا فعلا مش عارف ممكن اقول ايه اكتر من الي قلناه قبل كدا عن فتح الله، كتبت مقال كامل عن محمود فتح الله، ومروان قطب كتب مقالين تقريبا، انا هكتفي باني هحط لينكاتهم في آخر المقال لان فعلا فتح الله خلص كل الكلام، مفيش حاجة تانية ممكن تنقال عن فتح الله

عبد الشافي

ss3

انا فعلا متضايق وانا بكتب الكلام دا، لأن عبد الشافي من ارجل واكثر لعيبة الزمالك عقلا وذكاء واخلاص ومستوى لكن مالناش عزيز غير الزمالك، عبد الشافي مستواه انحدر بشدة الموسم دا، دا غير ان ملوش اي بديل ودا برد مؤثر على مستواه، نتمنى عبد الشافي يرجع تاني لمستواه لانه لعيب مهم في الفريق.

مش معقولة ابدا لعيب في ذكاء عبد الشافي يتسبب في الجونين دول :


في ماتش 3-2 ، شافي واقف كاسر مصيدة التسلل بمسافة كبيرة وسمح بانفراد الاغا بجون سهل جدا!

وجون فيتا كلوب الي مستحيل مدافع مبتدئى يلبسه كدا !، في موقف واحد ضد واحد آخر حاجة تعملها انك ترمي جسمك على المهاجم وتسمحله يلمك كدا!، دانت لو بتلعب بلاي ستيشن بس عارف في المواقف دي تcontain المهاجم وتقفل عليه الزوايا لحد مايجيلك مساندة !





لكن برده لازم احقاقا للحق نشيد بعبد الشافي الي ابتدا الفترة الاخيرة يستعيد مستواه وتوج مجهوده بجون اوروبي خارف في ماتش الهلال!.

دا كان استعراض لمشاكل الزمالك الدفاعية بشكل عام، وهي زي ماقلنا بوضوح، ان طريقة الHigh Backline هي ارحم طريقة نظرا لسوء مستوى المدافعين، لكن في نفس الوقت playing very high و تقديم الباكات للتلت الاخير خاصة مع غياب لعيبة وسط دفاعي حقيقية هي مبالغة، تأخير الخط خطوات وتثبيت الباك العكسي ولعيب وسط مدافع في كل هجمة تأمين ضروري لازم نلجأله.

تدني القدرات الفردية للعيبة الدفاع خاصة محمود فتح الله لازم ليه حل!، الاستغناء عن محمود فتح الله واستقدام مدافع يكون اذكى، اسرع شوية وعنده قدرات معقولة في التغطية –وان كنت شخصيا بفضل 2 مدافعين لان حتى ياسر مازال لا يعتمد عليه 100%- وطبقا لمتابعتي افضل من على الساحة محمود عزت مدافع المقاولين العرب، وهناك انباء تتردد عن التعاقد مع مدافع لا بأس به ايضا هو احمد دويدار –لم اتابعه لكن اي مدافع هو بالتبعية افضل من فتح الله.

الحاجة الشديدة للاعب خط وسط مدافع، نور السيد لا يستطيع اداء هذا الدور، مستواه منحدر بشكل غير مفهوم ويجب ان يجلس على الدكة قليلة ليراجع نفسه، ورغم تطور توفيق فهو ليس كافيا لتحمل عبء وسط الزمالك بعد!

الاهم من كل هذا هو استقدام حارس جيد لديه قدرات اللعب كحارس قشاش مسيطر على مساحاته وبيطلع على الكور العرضية كويس على الاقل عشان يرحمنا من غباء تمركز المدافعين، وطبعا لا جدال في ان احمد الشناوي هو الافضل حاليا، والاهم هو اعتزال عبد الواحد او الاستغناء عنه والاكتفاء بما قدم حتى الآن !

واخيرا، عبد الشافي يحتاج لمنافس، يحتاج للاعب باك شمال قوي يجلسه قليلا على الدكة ويريحه بعض الشئ، والزمالك بشكل عام يحتاج لباك شمال يستطيع ان يلعب عرضيات متقنة ! . .


نور الدين ابراهيم 


 

 شارك برأيك من يستحق التجديد و البقاء و من يستحق الرحيلtwiztvz












Read 28126 times Last modified on الأربعاء, 28 أيار 2014 22:53

المباريات المقبلة

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors