دفاع العالمي (1) : لعنة فيلاس بواش

Written by  نور الدين
Published in نور الدين
الثلاثاء, 20 أيار 2014 19:54
Rate this item
(0 votes)

لعنة فيلاس بواش

Advertisement


 


يدخل الدوري المصري مرحلة الحسم، ويتبقى للزمالك مباراة وحيدة يجب الفوز بها للتأهل للدورة الرباعية ، في نفس الوقت خسرنا أول مبارياتنا بدوري المجموعات الافريقي، المرحلة الاقوى والاهم في البطولة الافريقية الغائبة. في المراحل دي، شكل الكورة بيختلف، أهمية الدفاع المنظم والصلب بتكون هي المفتاح الأول للفوز، عدم الخسارة بياخد اولوية ، الاهتمام بالتنظيم الدفاعي خاصة في ماتشات افريقيا برا ملعبنا والي منها ماتشين في ملعبين مخيفين في مازيمبي والهلال بيبقى ليه اهمية قصوى..

عشان كدا رغم ان فيه مشكلة عقم هجومي واضحة في طريقة لعب الزمالك، قررنا في Zamalek.tv اننا نتناول بالتحليل التكتيكات الدفاعية الزمالك في عهد ميدو على مقالين متتابعين..

ميدو قرر من اول يوم مع الفريق انه يلعب بVery high backline ، او بتكتيك الدفاع المتقدم،وهو ان خط دفاعنا وقت حيازة الكورة بيبقى متمركز قبل خط السنتر بخطوات قليلة. ومش بس كدا، لكن كمان جزء تاني من التكتيك دا اننا لما بتبقى الكورة معانا الباكين بيصعدوا ا للتلت الاخراني اعتمادا على توزيع لعب من نور وتوفيق او محمد ابراهيم

متفهم جدا الأسباب الي دفعت ميدو لانتهاك التكتيك دا، طريقة الدفاع المتقدم بتساعدك تقلل المساحة بين الدفاع والوسط بشكل كبير، ودا ليه مميزات عديدة، اولا مع القدرات الفردية المتواضعة جدا لمدافعي الزمالك ، خطر اوي تحطهم كتير في مواقف واحد ضد واحد، خاصة لعيب طري زي فتح الله مبيضغطش ودايما بيرجع لورا ويسيب مساحات للخصوم ، فالطريقة دي بتضيق المساحة وبتقلل المواقف الدفاعية الي محتاجة قدرات فردية، دا غير انها بتساعد على تقليل المساحة بين الدفاع والوسط وبالتالي المساحة المطلوب من لعيبة الوسط تغطيتها، بتزنق الخصم في مساحة اقل وبتسمح لخط الوسط يضغط بشكل متقدم اكتر وبالتالي بيقطع الكورة بدري ومن اماكن حيوية بتسمح بانك تشن هجوم مضاد سريع.

بس في نفس الوقت لو فريقك معندوش امكانيات انه يلعب بالطريقة دي، بتبقى مشكلة كبيرة، لان الاسلوب دا بيخلي فيه مساحات كبيرة في ضهر المدافعين وممكن تنضرب بباص طولي ووقتها هيدي المهاجم فرص للانفراد، تطبيق الطريقة دي بشكل غلط محصلته بتكون زي ما شفنا في ماتش طلائع الجيش كدا، كمية فرص وانفرادات كان ممكن تخلينا نطلع خسرانين سكور تاريخي لولا ستر ربنا او زي المشهد الاوضح لمساوئ تطبيقها وهو مبارة بتروجيت.

دا غير ان طلوع الباكات للتلت الاخراني بيسبب مشكلة تانية، ان في حالة فقدان الكورة زي ما بيحصل بتبقى تلاتة على اتنين او اكتر للمنافس، موقف شبه اللي بيحصل مع البرسا لما داني الفيس و خوردي البا يكونوا مع بعض

طبعا مفيش في الكورة حاجة اسمها طريقة كويسة او وحشة، الموضوع ببساطه متعلق بقدرات فريقك وتكييف الطريقة الي بتلعب بيها مع القدرات الفردية للاعبين ولما دا ميحصلش بتفشل وبتحصل مشاكل كبيرة.

مقومات تطبيق High backline بشكل عام بتتضمن قلبي دفاع فيهم حد عنده سرعات عالية، وباكات سريعة عشان تقدر لو اضطرت تتحط في سباق سرعة تفوز بيه، ومحتاج قلبين الدفاع يبقى عندهم تمركز كويس يسمحلهم يطبقوا مصيدة تسلل سليمة ، والمهم كمان يكون عندك حارس مرمى قشاش sweeper keeper يقدر يخرج كويس من مرماه ويغطي المساحة الكبيرة الي قدامه زي ما بيعمل حارس زي نوير مع بايرن او هوجو لوريس مع توتنهام مثلا

طبعا اختيار ميدو لتطبيق الHigh line مفهوم اسبابه زي ما قلنا وواضح بالنسبة لي ان الهدف الرئيسي انه يقلل فرص الخصم ويغطي عيوب القدرات الفردية المتواضعة لخط الدفاع ، لكن في نفس الوقت بيزود خطورة الهجمات القليلة الي بتيجي عليه بشدة. وخاصة وهي نقطة الضعف الاقوى في تنفيذ التكتيك دا حاليا، ان حارس المرمى بتاعك مبيغطيش ولا جزء من المساحة الكبيرة دي.

وافتكر كدا جون فيتا كلوب التاني، كورة طولية من نص الملعب (الي عدم ضغطه على الولد مأساة تانية هنتكلم فيها وقت تاني)، المهاجم عدى بسرعته وسط ثنائي الدفاع البطئ ولاقى وحيد الي فضل متسمر مكانه وكان ممكن يطلع ينهي الكورة دي من بدري اصلا.



ميدو حاول يطبق الفكرة دي باستخدام باكين سرعتهم كويسة عبد الشافي في الشمال وعمر جابر او حازم وكلاهما سريع على اليمين، وحاول يعتمد على ثنائي قلب دفاع ياسر ابراهيم و محمود فتح الله -من متابعتي دول الاساسيين عنده- على اعتبار ان فتح الله الي بيركز على التمركز والتغطية و ياسر البدني الي بيخش في الالتحامات ويقطع وهو الي بينطلق في حالة الاحتياج لسباق سرعة، لكن التركيبة دي كما هو واضح مش ناجحة، اولا سرعة الثنائي ليست على القدر المطلوب لbackline عالي اوي كدا، فتح الله لاعب ناعم مبيضغطش كويس ودي اهم مقومات الدفاع المتقدم وياسر مازال رغم انه لعيب كويس مازال بيرتكب اخطاء وقوته في الالتحام والتمركز محتاجة تطوير.

جونين دجلة في الماتش الأخير دليل واضح على ملاحظتنا عن الثنائي، الجون الاول بدأ بهفوة مباشرة من ياسر ابراهيم مينفعش تحصل في التكتيك دا، والجون التاني جي بسبب النعومة الشديد من فتح الله في التعامل مع الكورة الطولية الي رايحة للأغا ومبيضغطش كويس اطلاقا ..





ودا فيديو قصير عن هوجو لوريس حارس توتنهام، من افضل الحراس الي بيلعبوا دور الsweeper keeper، يديكم فكرة عن ازاي الحارس مفروض يتصرف في حالة انك بتلعب High backline :



والأدهى بقى من كدا، ان ميدو في الماتشات الي الثنائي الاساسي بتاعه –فتح الله وياسر- ملعبوهاش متخلاش عن الاسلوب دا!، في ماتش الطلائع كنا بنلعب بفتح الله و صلاح ولعب بنفس الطريقة رغم ان ال2 سرعتهم محدودة جدا جدا، وكانت النتيجة ان لولا الستر كان هيحصل سكور تاريخي، وطبعا المأساة الاكبر في ماتش بتروجيت بسبب نفس الاسلوب!.

للأسف ميدو بيعيد في النقطة دي تجربة فيلاس بواش الفاشلة مع تشيلسي، قائد دفاع تشيلسي جون تيري ماكينة قوية بتجيد لما الكورة تبقى قدامها، قوي في الكرات العالية والالتحامات لكن متستناش منه كتير لو حطيته في سباقات سرعة، في وجود مورينيو لما كان بيحب يقدم خط دفاعه شوية كان جنب تيري مدافع ذكي وسريع اسمه كارفاليو يسمح له يعمل تكتيك زي دا، لكن في موسم فيلاس بواش كان رفيق تيري اما ايفانوفيتش او لويز، والثنائي مش سريع ولويز بالذات عنده مشكلة دائمة في التمركز، وبيتر تشك كمان الي مش من الحراس الي بتتقدم كتير، كانت النتيجة مش بس الفشل، لكن نتايج مخزية زي خماسية ارسنال مثلا، لكن مع عودة مورينيو وادراكه لقدرات دفاعه كان بيلعب حتى في اوقات هجومه بدفاع عميق Deep defense عشان يستفيد من قدرات تيري الجبارة خاصة لما يلعب جمبه كاهيل، ودا ادى لسجل دفاعي ممتاز للفريق طول الموسم..

اهداف مباراة ارسنال 5-3 تشيلسي، 8 اجوان تقريبا كلها بسبب طريقة الHigh backline



صورة بتوضح دفاع AVB مع تشيلسي :

لعنة فيلاس بواش

في مرحلة حاسمة زي دي لازم ميدو يدرك قدرات المدافعين الي عنده ويلعب بقدر امكاناتهم، متفهم تماما ان الدفاع المتقدم بيدي مميزات هجومية كبيرة وبيريح خط الوسط، لكن تكلفته عالية جدا، وحتى لو ممكن تحملها خلال ماتشات الدوري، مش هنقدر على تكلفتها في ماتش مهم زي اتحاد الشرطة ولا في ماتشات البطولة الافريقية، واحب انبه لان سجل الزمالك الدفاعي في الدوري سئ جدا!، هو ال6 في ترتيب عدد الاهداف الي دخلت فيه في المجموعة، ولو جمعت المجموعتين على بعض يبقى ترتيبه ال11!.

لازم ميدو يتدارك المشكلة دي، مش بنطالبه يلعب Deep line defense لان قدرات اللعيبة الفردية هتخذله برده في مواقف، لكن يرجع خط دفاعه ورا اكتر من كدا شوية، مينفعش بنوعية اللعيبة دي يلعب بدفاع متقدم اوي كدا، اكتر من نص الاهداف الي دخلت فينا كانت نتيجة مباشرة للتكتيك دا سوء تنفيذه وافتقاد ادواته، والنقطة التانية المهمة هي استمرار تثبيت نور السيد في الارتكاز الثابت دفاعيا لان دا في المباراة الاخيرة حسن كتير من الاداء الدفاعي، رغم ان نور مش احسن واحد يأدي الدور دا بس للاسف مفيش غيره، يمكن الموسم الجي عودة ابراهيم صلاح تحل المشكلة دي.

وطبعا الي انا بقوله دلوقتي دي حلول بسيطة وسريعة للمآسي الي عندنا، لكن الحل الحقيقي هو نسف خط الدفاع دا باكمله ، خاصة الثنائي عبد الواحد وفتح الله الي هيتسببوا للسنة التالتة على التوالي بخروجنا من بطولة افريقيا باخطائهم الشخصية لوحدها !

استنونا في المقال الجي هنكمل بنقط مهمة تانية اثرت بشكل مباشر في المشكلة الدفاعية للفريق.

ملحوظة: لمن يريد الاستزادة ، مقال ممتاز على zonal marking بيشرح تكتيك فيلاس بواش في الضغط وعيوبه ومميزاته ( المزيد )




نور الدين

nawarny

 

 شارك برأيك من يستحق التجديد و البقاء و من يستحق الرحيلtwiاخبار الزمالك












Read 38069 times Last modified on الثلاثاء, 20 أيار 2014 20:00

المباريات المقبلة

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors