كل سبت مع علاء عطا .. شيزوفرينا مشجع زملكاوى بأصعب دورى فى التاريخ !

Written by  علاء عطا
Published in علاء عطا
السبت, 01 آب/أغسطس 2015 19:54
Rate this item
(4 votes)
كل سبت مع علاء عطا كل سبت مع علاء عطا كل سبت

Advertisement

 
فاز الزمالك بالدورى،عنوان إشتقنا اليه بعد مرور سنوات عجاف تجرعنا فيها كل أنواع الشد العصبى ورغم هذا ظل حب هذا الكيان أبدى لم يهتز ولو للحظة لليقين التام أن حب الزمالك لا يفهمه سوى عاشقوه،موسم طويل ذقنا فيه كل أنواع الضغط لما لا فالمنافس جن جنونه وهو يرسم لنفسه كل المبررات الممكنه والغير للتأثير على المتصدر فهو لم يتذوقه طوال الـ 38 اسبوع ولكن الزمالك ارتدى ثوب الابطال وتكاتف لاعبوه نحو تحقيق الحلم وتحدوا كل ما قيل من حكام وبريزنتيشان وغيرها الى ان تبقى شئ واحد فقط عشان تكمل القصة وهى " الإخوان إدوا الزمالك الدورى"عشان تكمل!!

اسمحوا لى أن اختصر لكم الموسم ومادار بذهنى فى السطور القادمه،لعل وعسى استطيع ان انقل ما دار بداخل الكثير منا.

الزمالك بطل الكأس مع ميدو..طب هيكمل ولا لأ؟كمل..ماتشات افريقيا..خروج..هيتم اقالته؟لا مش هيتم..حسام حسن؟تانى..هيبقى البديل..ليه؟..عايزين نقله تقوم تجيب حسام؟!لا هو حسام..اقالة ميدو..عين حسام..العب سوبر..اخسر سوبر..نحس بعيد عنك بعد ضربات جزاء درامية..خناقة مرتضى وحسام..اتصالحوا..مرتضى يعلنها حسام هيكمل مهما كان..بداية الدورى وفوز كبير عالجيش..احتراف عبد الشافى..يمشى مايمشيش..فلوس هبل..مرتضى قبل فحسام اتقمص..الزمالك يتعادل بعدها مرتين تلاته وحسام يقولك انا مش جايب لعيبة الريال..فصلك بدرى بدرى..مرتضى اتهور وشال حسام..حط صلاح..لغاية ما ييجى جديد..اطرح اسماء..اعلى بسقف الطموحات..هوبا اتهور..بيفاوض كوبر..لا ياعم مش كوبر..ده كبير..ده كخة..ده اصله بيخلى اللعيبة تفطر فى نهار رمضان وبيسكر بعد الضهر..هوبا سقف المفاوضات قل..هوبا خش بباتشيكو..هوبا العجلة مشيت..هوبا ماتش انبى..الهزيمة..شهر العسل انتهى..مرتضى اتهور..باتشيكو اتقمص..مرتضى بيقول بالسلامة ..وبعدين ماتزعلش ياعم حقك علينا بالبرتغالى..باتشيكو يرجع..هوبا هرب ويافرحة ما تمت..ارجع يا صلاح..صلاح حلو على فكرة..ليه انجازات..مكمل..هوبا مؤمن ماشى..طب ما يقعد..انبى عاوز فلوسه..انبى باع مؤمن للاهلى..بالسلامة..طب نكمل بصلاح ولا لأ..لازم يمشى..مش عايزين نبقى فريق محلى..فاوض مدربين..فييرا..لا مش جى..مرتضى يشتم فييرا..طب حط "ر" فى النص..تبقى فيريرا..جيب فيريرا..ماتش انبى تانى بسرعة كده..الجمهور لازم يرجع..يرجع مايرجعش..يرجع ياعم..يوم الفرح اتقلب ميتم..يوم حضره شباب وبنات ورجاله زى الفل..بس للاسف راحو ضحية تعنت داخلية ورئيس نادى بيعاند مع جمهوره بسبب وبغير وقبلها قصص فى النص مالهاش لزمة بينهم..قفص حديدى بشع..انتهى بقنابل مسيله راح ضيحتها اشرف الناس واطهرهم..20 شهيد وضحية راحوا نتيجة اهمال بلد لا تفقه شئ عن معنى الروح..النهاية ان صحابهم بيتقبض عليهم ويتم زج اسم الاخوان كنوع من الاستسهال والاستهبال..ومافيش مسئول واحد فى البلد بيتحاكم..مافيش واحد من الداخلية حتى اتحول تحقيق ليه ضرب قنبلة غاز فى مساحة زى ديه..وراح دم الناس هدر..بس عشان البلد اتعلمت انهم لو لغوا الدورى مش هيعرفوا يرجعوه تانى..راح الاعلام يلهى عن القضية الاساسية وركز مع قضية جابر واللاعبين..جابر ندل لا مش ندل..اللعيبة عرفت ولا لأ..المهم نبعد عن تفكير الناس المنطقى..وفى النهاية قرروا رجوع الدورى بعد شهرين..وكان القرار الصعب..اعمل ايه؟قررت اوقف متابعتى للدورى ده..صعب اكمل..قولت اعمل بوست اعتذر فيه للناس انى مش هكمل متابعة الدورى وهتوقف عن الكتابة..بس جوايا احساس ان اللى هعمله ده شئ من المتاجرة على أراء الغير فتراجعت..شفت ناس قاطعت وليهم حق..وناس قالت ده مش هيرجع حق حد ولو بالمنطق ده كنا وقفنا الحياة بعد الثورة مع اهدار حق كل شهيد فى البلد ديه ودول كمان رأيهم منطقى..وناس قررت تهاجم اللى هيتابع طول ما مرتضى مكمل وحق الناس مارجعش ودول كمان رايهم منطقى..حسيت ان كل الاراء منطقية..وكل واحد ونيته وقراره فى الاختيار..قررت اسكت شوية..عشان اعرف هعمل ايه..مش عارف؟فشلت اجاوب..انا فعلا قعدت اعرف نتايج الزمالك من غير ما اتفرج..بس ماتش العودة امام الفتح الرباطى بالمغرب حسسنى ان مصير الزمالك فى الموسم كله فى الماتش ده..غريزة الزملكاوى اللى جوايا خليتنى اتكلم واهلل مع جول عمر جابر..سامحنى يارب..الانسان ضعيف..وقدام حب النادى مش قادر..فعلا الزمالك عاد كبير وقدر يتجاوز محنته..جمهور عارف مين الجانى وفى نفس الوقت عارف ان الحياة هتمشى ولازم يخلد ذكرى شهداءه ولازم يبقى فاهم هو بيحب نادى مش اشخاص..فقررت اكمل..لان الناس اللى راحت كانت رايحه عشانه..وهو لو خذلهم هيبقى صعب كمان عاللى عايش قبل اللى مات..اه هى كورة..بس المعنى كبير..كمل الزمالك..ومشى مع فيريرا كويس..خسر من سانجا..وكانت مباراة القاهرة فيصل مرة اخرى فى كتابة مجد إما الاستمرار والاستقرار او انهيار جزء من الحلم..بين كل نجاح ونجاح يأتى مرتضى لينتقص منه بتصريحات ساذجة سخيفة بلا مستوى..الزمالك يتقدم فى الدورى وبرحيل جاريدو حبيب الزملكاوية بدأت ثقة الاهلاوية تزداد على مضض وتنخفض الطموحات مع اى اخفاق وتصدير القلق للزملكاوية ورغم ان تعادل بتروجيت واكب تعادلهم مع الجونة فكان غير تأثير ثم جاء بعدها فوز الصفاقسى ليعيد البسمة من جديد وافتتاحية رائعة لدورى المجموعات..سقوط المقاصة كان تأثيره قوى فالمرحلة دخلت الجد القصوى واى هزار قد يعصف بالنجاح..مع كل سقوط يستشيط الزملكاوية غضباً ضد فيريرا..ولكن فوز الاسماعيلى اعاد الكثير..عاد معروف..عادت الثقة..عادت الروح.. بعدها فوز اورلاندو كتب شهادة الاتزان النفسى حتى تجاه اللاعبين واهمهم معروف الذى اظهر اوراقه..عاد الفريق وحسم موقعة النصر..بعدها جاء مباراة التتويج..مباراة شابهها كل انواع الدهشة من تحديد مكان الموقعه للتوتر الذى نقله رئيس نادينا للجمهور ولاعبيه قبل الاهلى..تصريحات..تحديات..وفى النهاية ذهب اللاعبون باكياس رمل فى اقدامهم وكأنهم يمارسون كرة القدم لاول مرة فى جبال بوليفيا فخسروا الموقعه باقدام زكريا..تأجل الاحتفال اسبوع..الى ان اهداه الاهلى بنفسه للزمالك فتم التتويج وعادت الفرحة لقلوب الزملكاوية.

كان هذا ملخص لـ 365 يوم شهدته كزملكاوي نحو اللقب..نهاية اريد ان اقول ما بداخلى خلاصة للموضوع،حينما خرج مرتضى ليبكى ويعلن رحيله لم يتأثر أحد فالمقوله معروفه"يمكنك ان تضحك على الناس بعض الوقت ولكن لا يمكن ان تضحك على الناس كل الوقت"وفى نفس الوقت ربط فرحة الزمالك والزج باسم مرتضى لانتقاص الفرحة لن يستطيع احد سلبها فالمقياس الحقيقى النية وجمهور الزمالك ذكى بما فيه الكفاية.

رسالة لمرتضى منصور وانا اعلم انه رجل لا يأخذ بنصيحة أحد،اتقى الله فى جمهور الزمالك وفى نفسك كفانا مهاترات،نريد بناء لموسم جديد بدفعة هذا العام،فاذا اردت ان يبقى لك انجاز فالصمت والرد بصفقات وبطولات خير رد ولن يفيد الصوت العالى شئ فما تبنيه فى شهر تهده فى يوم،كفانا ضحايا ومساجين فهى كرة قدم فى النهاية،كفاية استعراض عضلات وشهره فلقد وصلت لكل شئ تريده،ولكى نبقى فى القمة يجب جميعاً ان نتكاتف لتحقيق حلم السنين القادمه وهو البقاء فوق القمة،بقاء فيريرا مهم،بقاء النجوم مهم،وحتى لا اكون فى النهاية ظالم،نصف نجاح هذا الموسم هو الفلوس التى احضرها مرتضى وهى لغة الكرة وهى التى ميزت الاهلى كثيراً طوال هذه السنين،واذا كان جمهور الاهلى يقلل من كل شئ لحد الاستحقار،فرسالتى الاخيره،انتم الذين تستحقون مرتضى فالعنصرية التى تتعاملوا بها نحو الاخرين تجعلنى اعتقد قليلاً انكم تستحقوا شخص مثله لا نحن لانها بلد اصلا بلا قوانين!

مبروك يا زملكاوية وافرحوا،وماتخدوش بكلام حد فحب الجمهور لفريقه لا يفهمه سوانا وهذا يكفى،رحم الله شهداء الزمالك ويارب سامحنا على تقصيرنا نحوهم.

 

علاء عطا 


Advertisement


Read 16621 times Last modified on السبت, 01 آب/أغسطس 2015 20:17

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors